Habari dit bana romaneasca si internationala
Bucureşti — Dalga di căldură care agudeasti nai cama marea parte ali României lo sila ază. Temperaturli maximi pot s-agiunga până la 42-44 de grade Celsius, ama la nivelu a solui, tru marl’i casabadz, va s-hiba multu ma mari. Di alta parti, nica di aza tahina s-apufusi un cod aroşu di can’ină, apufusitu tra 19 di giudeţe dit sudlu şi estul a vasiliil’ei şi tra Bucureşti. Avertizarea armâni tru practico până astară, deadun cu un cod portocaliu tra ndaua giudeţi dit nord-estu, estu, tentru şi sud-vestu şi di un cod galbinu, tru alti nândaua dit tentrul a vasiliil’ei. Discomfortul termic easti multu mari, inditili temperatură-umezeală hiindalui cu multu pisti valorli normale. Autorităţle loara meatri tra s-n’icsureadza zn’iili a can’inal’ei, dimec prit discl’idearea a nascantor locari di prot-agiutor şi asiguripsearea a apal’eai ti-a-beari. Camioanele di mare tonaj nu au izini tra s-urdina pi cal’iurli publiti zn’iipsiti di can’ină, a deapoa trenurli imna cu viteză n’ica. Maxus astară, instabilitatea atmosferică va s-l’ia sila tru nordu, tentru, nord-estu şi tru munta, va s-aiba fartun’i, ploiuri torenţiali, grindină şi va s-bata kiritlu.
Roxana Vasile, 01.07.2017, 16:36
(Roxana Vasile)
Bucureşti — Tru România intra tru practico, la 1 di alunar, Nomlu tra tin’ia di cafi mes dit sistemlu public, după ti, tru kirolu a stămânal’ei ti tricu, fu promulgat di prezidentul a vasiliil’ei Klaus Iohannis. Efectili reali a actului normativ va s-hiba dukiti, ama dit ahurhita a anlui ti yini. Nomlu pruveadi crişterea a tin’iilor di cafi mes a bugetarlor, tru yinitorl’i tinti an’i, cu 50% s-cama tru medie. Tut di la 1 di alunar criscu, dimec, cu 9% şi valoarea a punctului de pensie. Tru contrapartidă, prota dzuua a aistui mes adusi şi una creaştiri cu 8 protenti a pahalui la energhia electrica tra consumatorl’i casnit — simfun cu calindarea di liberalizare. Treapta di bitisita, dimi liberalizarea completă, va s-faca la 1 di yinaru 2018, cându pahalu la energhie va s-hiba apufusitu di bursă.
(Roxana Vasile)
Bucureşti — Bucureşti s-tani tru kirolu 1-30 alunar a 9-a ediţie a Festivalului Internaţional di Teatru pi Geadei, la care va s-l’ia parti sute di artişti dit România, Franţa, Columbia, Italia, Germania, Olanda, Austria şi Spania. Tru cathi week-end, di viniri până dumanică, dzuua tuta, geadeili va s-hiba mplini di spectacole itinerante a artiştilor pi catalidzi, di spectacole di mayie şi street dance, di statui vivante ica personaje supradimensionate. Seara, peisajlu bucureştean va s-hiba animat de acrobaţii, spectacole di lun’ină, jonglerii cu foc, reprezentaţii di tango şi hvaia di cabaret.
(Roxana Vasile)
Bucureşti — Nai cama ghini cotată agiucătoare română di tenis, Simona Halep, loclu 2 WTA, va s-agioaca, luni, contra a Marinal’ei Erakovic dit Noua Zeelandă, loclu 129 WTA, tru protlu tur a turneului di Wimbledon, nai cama vecl’iu şi ma cu anami dit ateali 4 di Mari Şlem. Anlu ti tricu, tru arada a idyiului turneu britanic pi iarbă, Halep fu sfert-finalistă, a deapoa tru 2014 – semifinalistă. Tut tru protlu tur la Wimbledon, românca Monica Niculescu (51 WTA) va s-alumta cu Magdalena Rybarikova (Slovacia), loclu 85 tru lume. Sorana Cîrstea (62 WTA) va s-alumta cu olandeza Kiki Bertens (24 WTA), iara Irina Begu (69 WTA) va u aiba adversară britanica Naomi Broady (108 WTA). Neise, Ana Bogdan (114 WTA), care intra tra prima oară ndreptu pi tabloulu printipal la un turneu di Mari Şlem, va u andamuseascâ chinezoaica Ying-Ying Duan (64 WTA). La ficiori, românlu Marius Copil, loclu 85 ATP, va-lu aiba adversar, tru protlu turu, ghirmanlu Peter Gojowczyk, 140 ATP.
(Roxana Vasile)
Armanipsearea: Tascu Lala
