Apofasea a Curtil’ei Constituţionale

Tricu un mes di la adoptarea a controversatal’ei ordonanţa di urgenţă 13, prit cari guvernul român mindui tra sa u relaxeadza legislaţia penală, ama daldzali scoasi tru mgdani di ea nu s-danasi, acă actul fu anulat. Luni, Curtea Constituţională agiumsi pi isapea că avu un conflictu juridic di turlie constituţională anamisa di Direcţia Naţională Anticorupţie(DNA) şi executiv. Aestu conflictu — cundil’e CCR — s-feati di furn’ia ca procurorl’ii ş-loara putearea tra s-verifica legalitatea şi oportunitatea a unui actu normativ, respectiv a canascautal’ei ordonanţa 13, cu călcarea a competenţelor constituţionale a Guvernului şi a Parlamentului. Curtea exighisi că autoritatea di legiferari ţane di Parlament, ama guvernul poate şi el s-facă aestu lucru prit ordonanţe.

Ştefan Stoica, 28.02.2017, 13:22

Tru aestu caz, goala autoritate abilitată s-verifica legalitatea a ordonanţilor guvernamentale easti Curtea Constituţională. Verificărli a procurorlor anticorupţie ligate di oportunitatea tra emiterea a ordonanţal’ei şi existenţa a avizilor exced autoritatea DNA şi suntu di competenţa a Parlamentului, respectiv a Curtil’ei Constituţionale, spune preşedintele a aistei, Valer Dorneanu.: “Lugursim că s-minti buna activitate a Guvernului şi s-mintira şi relaţiile cari lipseasti s-hiba anamisa di ateali trei autorităţ – judicătorească, executivă şi legislativă”.

Tra apofasili politice, miniştrii lipseasti s-da giueapi priot halats polititi, nu prit ateali di drept penal, cundil’e Curtea. După dimandarea a apofasil’ei di la CCR, preşedintele a Senatului, Călin Popescu-Tăriceanu, atel cari dipusi sesizarea, declara că relaţiile anamisa di puterile a statlui agiungu la normalitate şi că soluţia a Curtil’ei duti la evitarea a nascantor yinitoari conflicte inter-instituţionale.

Călin Popescu-Tăriceanu: “Parlamentul deleagă cătra guvernu posibilitatea tra s-adopta proiecte di nom şi ordonanţe di urgenţă şi Parlamentul easti atel cari li cenzureadză dit videala ali oportunitati; dit videala a legalitatil’ei masi Curtea Constituţională poate sa-apufuseasca ama nu Procuratura”. Luni, tamam tru dzuua ali apofasi CCR, DNA clasa una parte din dosarlu discl’isu tru cazul tra emiterea a Ordonanţal’ei 13 şi lu direcţiona cătra Parchetlu General. Procurorl’i anticorupţie au suspiciuni ti călcarea a nomlui – prit cari favorizarea a făptuitorlui, aspardzearea di înscrisuri ica prezentarea cu araua-pistusini di date inexacte.

Prezidentul a Curtil’ei Constituţionale, Valer Dorneanu, cundil’e că di aoa s-ninti pot s-hiba anchetate masi fapte cari atrag răspundirea penală directă, iara ancheta lipseasti s-hiba adrata cu respectarea a prerogativelor CCR, a Parlamentului şi Guvernului.

Autor: Ştefan Stoica

Atrmanipsearea: Tascu Lala