Prima pagină » Actualitate » Guvernul Cioloş, isapi după un an

Guvernul Cioloş, isapi după un an

Dzat di n’il’i di români işea, aoa si un an, pi geadei tra şi spuna niifharistusearea andicra di corupţia şi indiferenţa a autorităţlor, cari dusi tru minduita a lor, la un di nai cama urutl’i fanicadz di Bucureşti tru decheniili dit soni: incendiul dit clublu Colectiv, iu murira 64 di oamin’i. Premierlu social-democrat a momentului, Victor Ponta, ş-deadi demisia, iara după consultări cu reprezentanţal’ii a partidilor parlamentare şi a societatil’ei tivila, prezidentul Klaus Iohannis al’i deadi borgi al Dacian Cioloş s-adară un Guvern ninregimentat politic. Naulu Cabinet fu bagat pi ipotisi tru 17 di brumar 2015.

Roxana Vasile, 18.11.2016, 12:29

Cum gioi s-umplu un an di guvernare tehnocrată, Executivlu parastisi una isapi ti ari scupolu s-dimanda ali opinie publică ti realizări, ama şi tra proiectele pripuse şi nibitisiti. Ti furn’ia că, la instalarea a Cabinetlui, aştiptărle ali societate fura multu mari, meatrili ti s-loara – spuni Guvernul – mutrira reconstrucţia a pistipsearil’ei că poati s-guverneadza una turlie cu namuzi, transparentu şi hairlaticu. Ase, protlu scupo a actualal’ei guvernari fu asigurarea a stabilitatil’ei politica, economica şi sociala tru an electoral, marcat, tru primveară, di scrutinlu local, iara pi 11 di andreu di atel parlamentar.

Deapoa, Cabinetlu spune că apraftasi s-promoveadza transparenţa şi s-n’icsureadză birocraţia. Avu tru prota thesi a cilastaserlor Sănătatea şi Educaţia, prit reforme şi alocări bugetare. Tru idyea scară, debloca proiectili di infrastructură. La capitolu ‘apofasi’ suntu aradapsiti nomlu tra tin’ia di cafi mes unitara, cari lipsea s-hiba finalizat pană la bitisita a mandatului.

Tru un interviu la televiziunea publică, premierlu Cioloş exighisi că Executivlu nu apraftasi, până tora, s-promoveadza aestu actu normativ cari s-ndreaga inechităţli dit sistemlu bugetar, tra atea ca lipsea s-adră, prota s-prota, una bază di dati cu tuti tin’iili di cafi mes di la stat, tra s-cunoască tamam realităţli dit sistem.

Ia ti spusi Dacian Cioloş: “Anda avansăm tru baza di date cu adunarea a tutulor tin’iilor di cafi mes tra palteari, va s-putem s-bagam pi measa a Guvernului şi deapoa a Parlamentului şi un nom a tin’iil’ei di cafi mes unitara, cari s-hiba una realistă.” Guvernul român plândzi, al’iumtrea, atea turlie că reforma ali administraţie publica nu avu un imnaticu bun, cate nu avu andrupamintu politic.

Diznau, Dacian Cioloş: “Easti ananghi şi di una limbidzari a ligatural’ei anamisa di administraţia publică şi politic, tra atea că avem ananghi di predictibilitate tru aestu proces decizional, di limbidzami şi di eliminari a arbitrariului şi a apofasilor ad-hoc cari suntu loati şi cari zn’iipsescu hairea ali administraţie.”

Ndridzearea diznau a aparatlui administrativ pi criterii di profesionalismu şi axizeari reprezintă provocarea a yinitoaral’ei guvernari, cari ti s-hiba ea după legislativili di meslu ti yini spuni şi şefa a Reprezentanţal’ei di la Comisia Europena tru România, Angela Cristea: “Iti stat ari ananghi di vara dzati an’i tra s-agiunga cetăţeanlu s-ducheasca că s-feati una reformă a ipotisil’ei publiti şi ali administraţie publica.” Tru minduita ali Angela Cristea, una cearei va s-hiba guvernanţa discl’isă, tru cari cetăţeanlu nu easti masi beneficiar di politit publiti, ama si actor mintitu tru actul di guvernari.

Autor: Roxana Vasile

Armanipsearea: Tascu Lala