Candidaţ tra Parlamentul ali Românie
Majoritatea a formaţiunilor politice româneşti dipusira liste tra tute judeţili a vasiliil’ei şi cilastasira tra s-baga em numi nai tru politică, em parlamentari cu experienţă. Protlu ti angreaca tru actualu Legislativ şi favorit detaşat tru sondajele mutrindalui naetli di vot, PSD discl’idi lista tra Senat cu fostul ministru ali Educaţie Ecaterina Andronescu, iara tru vasilie fura bagaţ pi locuri eligibile alţa ti ma ninti avura portofolii, cata cum Rovana Plumb, Eugen Teodorovici şi Nicolae Bănicioiu. Ex-premierlu social-democrat, demisionar aoa si un an, Victor Ponta va s-candideadza tut Gorju (sud-vest) tra un nau mandat, iara liderlu PSD, Liviu Dragnea, candideadză tut tra Camera a Deputaţlor tru fieflu a lui dit Teleorman (sud).
Bogdan Matei, 28.10.2016, 12:19
Ia ti spusi Liviu Dragnea: Avem 40% mul’eri pi aesti liste, 40% tiniri, cama di 75% di candidaţ suntu nai. Avem economişti, jurişti, 40%, avum mari sinfer ti aestu lucru.” Protlu partid cari dipusi listili easti PNL, spus tru sondaje ca hiindalui prota avyiulie a dreptal’ei şi masi el gol ti poati sa u contesta hegemonia a PSD. Cu anami em tra măsturlakea profesională, em tra actili a lui caritabile, chirurgul neurolog Leon Dănăilă easti pi protlu loc la Senat.
Lidera PNL, Alina Gorghiu, cari candideadză, tut tra Senat, tru Timiş (vest), spuni că aspiranţal’i libearali: Suntu oamin’i dit tute dumeniile, multu ghini ndrepţa, oamin’i tin’isit – dauă condiţii care fac dgheafuraua andicra di alti liste.”
ALDE discl’idi listili Bucureşti cu atel’i doi coprezidenţa, Călin Popescu-Tăriceanu şi Daniel Constantin. Atel’i di ma nainti miniştri cata cum Teodor Meleşcanu ica Sorin Câmpeanu candideadză tru teritoriu, ama 90% di atel’i ngrapsit nu au fapta până tora politică – spuni Popescu-Tăriceanu, cari adavgă: Am nadie ca aesti alidzeri va u nsimneadza anvartusearea pozitia ali ALDE ca a treia furteaţă pi scena politică dit România, cari yine cu una alternativă la partidili ti suntu canascuti ca hiindalui tradiţionale.”
Atel di ma nainti cap a statlui, Traian Băsescu easti pi protlu loc pi lista a PMP tra Senat. Anamisa di proiectili pi care va li ndrupasca ma s-hiba aleptu easti şi tritearea la un Parlamentu unicameral, cu masi 300 di membri, aşi cum votara trei cirecuri di participanţal’i la referendumlu dit 2009: Va sa s-faca parlamentul di 300 di parlamentari, că va u minduim diznau Constituţia; va lu adutem diznau Nomlu ali Educaţie la turlia iniţială; justiţia lipseasti s-hiba anvartusită.”
Prezidentul UDMR, Kelemen Hunor, discl’idi lista di Harghita (centru) tra Camera a Deputaţlor. Bucureşti, protlu pi lista di la Camera a Uniunil’ei Salvaţ România easti liderlu a aistei formaţiuni nau isita tru videală pi scena politică, Nicuşor Dan, s-deapoa fostul ministru Cristian Ghinea. Tamama nainti di bitisearea a listilor di candidaţ, ambasadorlu american la Bucureşti, Hans Klemm, spusi că ligaturli anamisa di Statili Unite şi România pot s-hiba anvartusiti cara structura a Guvernului cari va s-hiba adrat după alidzerli parlamentari va s-yilipseasca principiul ali integritati şi axiil’ei ş-nu va s-acata tru isapi personaje cu problemi penale.
Autor: Bogdan Matei
Armanipsearea: Tascu Lala
