Lider di partidu, anchetat tra corupţie
Viteprezidentul liberal Vasile Blaga dimanda n’ercuri, ca demisioneadză dit aestă funcţie, că tradzi mana di la coordonarea ali campanie electorala şi că numata candideadză la legislativele dit andreu. Ma nainti, procurorii DNA avea dimandata că Blaga easti cercetat sum control judiciar tru un dosar di corupţie. Faptili vahi eara adrati anamisa di 2009-2012, cându Blaga, cari fu tru atel kiro ministru di Interne şi deapoa prezidentul a Senatului, deadi nascanti contracte di achiziţie publică tru una turlie preferenţiala. Tra aestu trafic di influenţă, el vahi ari loata comisioane di 10%, dimec, tut cu tut şapte sute di n’il di euro, di partea a fostului primar a casabalui Piatra-Neamţ (nord-est), Gheorghe Ştefan, ti easti si nasu protagonistu tru alti dosare penale, şi a unlui om di afaceri.
Bogdan Matei, 29.09.2016, 12:33
Comunicatlu a procurorlor anticorupţie spuni că Blaga aminta paradzl’i tra el isisi, ama şi tra partidlu a curi secretar general eara şi cari tru atel kiro eara la guvernare. Ama, aestu nu easti Partidul Naţional Libearal, ca easti fostul Partid Democrat Liberal, lugursitu, tru epocă, formaţiunea di suflitu şi capachea di vazi a fostului prezidentu Traian Băsescu. Ma amanatu, PDL vrea s-amparta, dimi majoritatea a membrilor a lui, cu Blaga ncapu, aleapsira tra fuziunea cu naţional-liberalii, a deapoa nostalgicil’i al Băsescu al’i loara torlu a aistui tru Partidul Minarea Populară.
Tru un comunicat dimandat dupu demisia a coprezidentului a lor, liberalii lugursescu ca apofasea al Vasile Blaga tra s-traga mana scoati tru migdani că aestu tin’iseasti ma multu di carieara politică printipiile di integritate apufusiti tru partid. Tru bitisita a aistei stămâna, libearal’i au programată una andamusi a Biroului Politic Naţional. Comentatorl’ii politit s-aşteaptă la un conclav mintitu, ti furn’ia ca niti tora PNL nu agiumsi s-hiba un partid omogen, a deapoa fuziunea cu democrat-libearalii armasi formală. Vecl’i naţional-liberali cutugursescu nail’i sot că adusira tru naulu partid pasivlu penal ti lu avea tru PDL. Tru arada a loru, atel’i di ma nainti pedilişti spun că suntu apufusiţ s-aleagă, exclusiv dit aradarikili a loru, un nau coprezidentu, cari s-hiba ninga naţional-libearala Alina Gorghiu.
Social-democraţl’i nu ş-ascumsira haristusearea andicra di mintireasili dit PNL. El’i suntu tru amprotusa pi aradarikea di nastanga a spectrului politic, kiro tru cari dreapta, ti easti ampartata anamisa di PNL, PMP şi ALDI, tamam loara nica una goadă. Nascanta analişti s-aşteapta ca una parte a electoratlui tradiţional liberal s-nkiseasca tora cata formaţiuni noi, cata cum fostul ONG, alaxitu tru partid, Uniunea Salvaţ Bucureştiul. Şi cari, la alidzerli locale dit veară, cu un sertu discursu anticorupţie, agiumsi categoric dinintea a PNL tru Capitală.
Autor: Bogdan Matei
Armanipsearea: Tascu Lala
