Vizita oficială a premierlui ali Românie, Chişinău (26.08.2016)
România ndrupasti ma largu procesului di reforme tru Republica Moldova şi ndridzearea irin’eatica a ceamaunal’ei dit Transnistria. Suntu declaraţii fapti di premierlu Dacian Cioloş, tru bitisita a vizital’ei oficiala faptt, gioi, Chişinău. El cundil’e că, anaparti di agiutorlu moral pi cari România îl da a cetăţenilor ali Ripublica Moldova, majoritar romanofonă, Bucureştiul deadi una prota parti di 60 miliun’i di euro dit un împarmut pi patru ani şi giumitate cu un toc preferenţial di 1,45%.
Valentin Țigău, 26.08.2016, 13:25
Ia ti spuni Dacian Cioloş: “Atea ti noi na aştiptăm şi atea ti noi andrupam easti dutearea ma largu a procesului di reformă. Tru aestă idee, videm şi aest acord di împarmut, a curi prota parti intra tru conturle a Guvernului ali Republica Moldova. Deadim si va s-dam agiutor tru ideea că aest guvern s-lo borgea s-baga tru practico nascanti reforme şi că aestu lucru tamam va sa s-faca.” Dit aestă prota parti, va s-poat s-hiba finanţate proiectele di dezvoltare a instituţiilor a statului, znuearea a cal’iurlor şi deblocarea a achiziţiilor publite. Tutunaoara, premierlu Dacian Cioloş adusi aminti si cundile, Chişinău, simasia ti u ara stimularea a investiţiilor româneşti tru Ripublica Moldova.
România easti protlu partener di emburlaki ali Moldova, a deapoa dutearea ma largu a reformelor va la da curayiu a investitorlor români, spusi premierlu, dândalu paradigma Transgaz şi Translectrica. Şi premierlu Pavel Filip cundil’e că Moldova va nu masi tra sa s-faca simfuna cu spaţiul di yisteri şi di printipii europene, ama si cu singirili di energie, tra s-curma vecl’ili vulenearabilităţ. El exighisi că agiumsiras pi akicasearea tra s-da sila tru cooperarea energhetica.
Ia ti spusi premierlu Pavel Filip: “Va s-dutem nainti interconexiunile tra energhia electrica, ama va s-cristem şi interconexiunea di gaze naturale. Zburascu, tru aestu caz, ti lardzearea a gazoductului Ungheni-Chişinău.” Vizita a premierlui Dacian Cioloş fapta Chişinau fu si furn’ia tra sa spuna una minduita mutrindalui rolu ali României tru naulu contextu regional la cari s-agiumsi dupu alikearea ali Crimeei di cătra Rusia.
Tru aesta noima, Dacian Cioloş declara: “România easti membră NATO, ali UE, easti una vasilie stabilă dit videala politica si economica şi ari volea ta s-agiuta tra tanearea tru idyea scara ali stabilitati şi a securitatil’ei tru reghiune. Tu atel dit soni summit NATO, di Varşovia, caftam si a alantor aliaţ dit arada NATO agiutor tra s-anvartuseadza prezenţa, ti tal’earea a curayiului tra itido crat şi va tra s-aprinda si s-duca ma largu ceamauna tru aestă regiune. Noi deadim curayiu tra s-ahurheasca diznau dialoglu 5 s-nica 2, tra s-aflam cearei pragmatiti ti ceamauna dit Transnistria, prit dialog. Cilastasim tra s-ufilisimu şi rolu pi cari putem sa-lu avemu nauntrul ali UE, tra s-ascumbusimu şi alţa parteneri europeni cari s-ndrupasca aestă minduita tru Republica Moldova.”
Pi scurtu, vizita a premierlui Cioloş ti u feati Chişinău adusi tru prota thesi marli temi a ligaturlor anamisa di ateali dauă state, ligaturi timil’iusiti ş-pi pragmatism, nu masi pi comunitatea di limbă si istorie.
Autor: Valentin Ţigău
Armanipsearea: Tascu Lala
