Pusputeari penală andicra di ziariştil’i di la Sky News
Un găl’inatu jurnalisticu s-alaxi tru un babageanu cavga judiciar cu vazi internaţională. Procurorii ali Direcţiei di Investigare a Infracţiunilor di Criminalitate Organizată şi Terorism (DIICOT) dit România ahurhira pusputearea penală, cu stepsul ti comunicari di informaţii false, contra a trei membri a pareiil’ei di la postul britanic di televiziune Sky News cari adra reportajul ti un asi minduitu trafic di armati. Izvuri judiciare spun că procurorl’ii va s-cafta audierea a jurnaliştilor britanit, prit una comisii rogatorii internaţionala. Tut cu tut lugursita ca hiindalui una manipulari nitin’isită, pseudo-investigaţia a reporterilor britanit poati sa-u zn’iipseasca securitatea a statului român — cundil’eadza giudicătorl’i di la Curtea di Apel la apofasea di viniri di arestari preventivă a cetăţenilor români protagonişti a reportajlui trucat şi a intermediarlui tra aesta afaceri.
Bogdan Matei, 18.08.2016, 12:43
Pitricut tru hapsani ti 30 di dzale, aeşta dit sonti suntu aflat cabati ca featira infracţiuni di constituire a unal’ei parei infracţionala organizata, nitin’iseari regimlu a armatlor, a barutil’ei şi dimandarea di informaţii false. Ancheta scoasi tru videa că, tru realitate, aşi-dzasa investigaţie jurnalistică nu eara thimil’iusita pi fapti şi lucri alithea, ca s-ma multu eara adrati dit iniţiativa a ziariştilor, cari parastisira ca hiindalui cadealithea date şi informaţii false. Aeşta ghio taha stea că protagoniştil’i a scenetal’ei dit păduri nu eara traficanţa di armati, ca masi oamin’i cu zanatea tra chiniyi, a deapoa armatli filmate li avea legal. Ma multu, a asi-dzaslor traficanţa la si cafta maxus, tu dzuua di 31 di alunar, cându fu filmat reportajlu, să zburasca româneaşti, aca limba a lor maternă easti maghiara, şi s-greasca replit dimandati di jurnaliştil’i britanit.
Tra tuta prestaţia actoricească, el’i vrea s-loa, uidisitu cu marturisirli a lor isisi, dauă n’il’i di euro. Tut pirmithlu easti cu ahât ma lavosu cu cât Sky News eara lugursitu ca hiindalui un izvur di pistipseari, a deapoa rigoarea a jurnaliştilor britanit easti totna yilipsita cu tin’ie di ma tinira presă libiră dit România. Reportajlu fu priloat di mass-media dit alte vasilii, a deapoa faptele prezentate, spun procurorl’i, scoasira tru migdani em sentimente reprobatoare contra ali Românie, em di insecuritate tru arada a românilor.
Una vasilie nu poati s-hiba agudită fără s-aiba lucri salami — feati timbihi premierlu Dacian Cioloş, chiro tru cari ministrul ali Justiţie, Raluca Prună, spusi că statlu român ari borgea s-da apandasi. Aca agiumsi cu paltarli pi stizma, sum dalga di stepsuri mutrindalui nitin’isearea a nai cama elementarilor normi deontologhiti, em a postului di televiziune Sky News, em a autorlui ti adra reportajlu, Stuart Ramsay, spunu ma largu că reportajlu easti alithea, ama relatări concordanti di Londra spun că nu pot sa-şi candaseasca niti barimu publiclu captiv.
Autor: Bogdan Matei
Armanipsearea: Tascu Lala
