Recorduri la Festivalu Sighişoara Medievală
23-ţa ediţie a Festivalui Sighişoara Medievală, nolgica ali Românie, fu una a recordurlor, trei mondiali şi un naţional. Organizatorl’ii vrura ca tru cathi dzuua ali andamusi s-aibă un recordu, cari deapoa s-intra tru canascuta Guiness Book. Easti zborlu ti hlambura a Cavalerlor, nai ma marea hlambura adrata tru chirolu a unui festival medieval, di 25 di metri s-cama, nai ma marea apală ornamentală analtata tru un festival medieval, Apala a Titanilor, şi nai ma marli cuvrig arucutos, cu un diametru di 20 di meatri, adrat tru un festival medieval, Hrana a babgean’ilor.
România Internațional, 27.07.2015, 14:02
Tra “Apala a Titanilor”, ndreapta tru una pistireaua dit Titatea Medievală a Sighişoaral’ei, na zbura tamam directorlu tehnic a festivalui, Dan Gliga:
”Apala isis fu adrata dit cilechi, avem una lundzimi di 453 di tentimeatri, tal’itura ari 20 di tentimeatri, si lardzimea a l’ei easti di 2 tentimetri. Ari nica şi blazoanili cari va s-hiba adrati dit halcuma, dit tablă di halcuma. Pi ningă aesta, la nivelu mânerlui suntu ateali doaua capiti di lup cari armatusescu aesta apală. Apala angreaca 135 di kiladz”.
Uidisit cu spusa a aistui, Apala a Titanilor cari va s-armâna di aoa si nclo tru goala titati medievală banată dit sud-estul ali Europa easti parti a proiectului Sighişoara Medievală – Protlu festival medieval dit România ngrapsit tru antritearea a recordurlor mondiale. Dumanică, tru dzuua dit soni ali andamusi fu surpat nica un recordu, nai ma marea masti populară – di aproapea 6 meatri analţimi ş-cama di 3 meatri lăţimi, masca a Vracilui Yitripsitor. Ea fu adrată di masturlu popular Vasile Ciocârlan, dit judeţlu Neamţu.
Marea paradă la cari loara parti cama di 300 di cavaleri, dumniţe şi trubaduri dit România, Vrgaria şi Ungaria discl’isi Festivalu, disvartit tru 2015 sum numa “Menestreli şi Trubaduri – Tinti secoli di muzică şi teatru medieval”. Chiro di 4 dzali pi geadeili şi tru pazarli di Sighişoara s-tanura concerte, reprezentaţii di teatru şi animaţii medievale, ndreapti di 12 di parei di muzică dit România şi Ungaria, 7 ordini cavalereşti şi 11 di parei di teatru şi animaţie medievală.
Pi ningă aminarli cu duxarlu, alumtili giuneşti, giocurli a dumniţilor şi muzica a menestrelilor, una musuteata a aistei ediţii eara farsili medievali giucate di actori a Trupal’ei Schema. Nai cama marli bateri di paln’i s-deadira la premiera a spectacolui Farsa a hârdăului( La farce di cuvier) după una apriduteari adrata di un ditru actori, Mihai Crăciun. Cathi an, festivalu medieval di Sighişoara aduti cama di 20 n’il’i di vizitatori dit vasilie şi dit xinatati.
Textul: Andreea Bojoi
Armanipsearea: Tascu Lala
