Unâ nauâ suţatâ pro-europeanâ tu Republica Moldova
Capii a partidilor proeuropeani di Chişinău — liberal-dimicratlu Vlad Filat, dimucratlu Marian Lupu şi liberalu Mihai Ghimpu – anyrâpsirâ, Gioi, achicâsearea di adrari a nauâl’ei suţatâ di guvernari tu Republica Moldova – Alianţa ti Integrari Europeanâ 3.
Corina Cristea, 24.07.2015, 13:24
Hâbarea mutrinda anyrâpsearea a documentului fu pitricutâ nica di Marţâ searâ, cu zborlu că PDLM va s-aleagâ premierlu, iara PD prezidentul a Parlamentului. “Easti unâ achicâseari politicâ bunâ, echilibratâ, ţi va s-asiguripseascâ unâ magioritati parlamentarâ stabilâ ti Republica Moldova”, dzâsi liderlu PLDM, Vlad Filat, subliniindalui că aţeali trei partidi s-achicâsirâ s-adarâ unâ alâxeari dealihea la capitolu Instituţii di îndreptu”, aesti dit soni lipsindalor s-hibâ depolitizati.
Vlad Filat: Ni achicâsim deadun că va s-asiguripsim unâ alţxeari dealihea, maxus la capitolu Instituţii di îndreptu”. Tora lipseaşti s-andridzem andamusea a Parlamentului tu cari s-hibâ învestit guvernul, iara pânâ tu inşita a meslui Alunar, Republica Moldova s-aibâ guvernu.”
Anyrâpsearea a achiâsearâl’ei ti adrari a Suţatâl’ei ti Integrari Europeanâ easti semnu ti duţearea ninti a cursului european a Chişinăului, dzâsi ş-liderlu liberal Mihai Ghimpu: Anyrâpsearea a aliştei achicâseari easti aţea garanţii ti duţearea ninti a cursului european fârâ di cari Republica Moldova, noi, cetăţen’ii, nu avem yinitor.”
Tu ţi mutreaşti alumta cu aruşfetea, Mihai Ghimpu hâbârisi că UE apruchie s-pitreacâ Chişinău misiun’i cari s-agiutâ la alâxearea ali giustiţii, iara experţâl’ii europen’i va s-lucreadzâ tu niscânti instituţii cum suntu Ministerlu di Interni, Procuratura Generalâ icâ Ţentrul Naţional Antiaruşfeti.
Naua suţatâ easti goala formulâ apruchiatâ ti împrustarea ma largu a Republicâl’ei Moldova – dzâsi şi liderlu a Partidlui Democrat, Marian Lupu: Suţata ţi u adrăm easti-ndriptatâ câtâ asiguripsearea a putearâl’ei ali vâsâlii dinâintea a gaiareţlor.” Uidisit cu algoritmul zburât, fu hâbârisitâ şi numa a persoanâl’ei ţi va s-candideadzâ ti ipotisea di prot-ministru – Maia Sandu, ministru tora tu lucru la Educaţii. Bitisi Facultatea di Management dit Academia di Studii Icunumiţi di Chişinău, ama ari şi studii tu ligâturi internaţionali la Academia di Administraţii Publicâ a Republicâl’ei Moldova – Maia Sandu adră dapoaia ş-un masterat tu administraţii publicâ la Harvard şi fu consilier al directorului executiv a Bancâl’ei Mondialâ.
Di un mesu ş-giumitati, guvernul moldovean, andrupât tu Parlamentu di comunişţâ, easti cumândisit interimar di Natalia Gherman, dupu ţi premierlu, Chiril Gaburici, ş-hâbârisi inşearea di pi ipotisi, ti furn’iea a unâl’ei anchetâ mutrinda diploma a lui di bacalaureat, ti cari s-dzâsi că easti pseftâ.
