Moţiuni di cenzurâ contra guvernului Ponta
Agudit susto di opoziţii şi mass-media, Guvernul di Bucureşti easti, pi di-unâ parti, cu pâltărli pi stizmâ. Ama, pi di altâ parti, giudicandalui dupu zboarâli aţilor ţi cumândisescu partidili membri, ari ahâtâ puteari cum nu avu canâoarâ.
Bogdan Matei, 09.06.2015, 12:57
Viniri, tu Parlamentu, va s-hibâ zburâtâ icâ votatâ moţiunea di cenzurâ pitricutâ di opoziţia liberalâ. Protili subiecti aliştei suntu problemili di andridzeari, di organizari di la secţiili di vot ditru xeani, la prezidenţialili dit Brumar, cându n’ii di oamin’I nu puturâ ş-aspunâ votlu, chiola şidzurâ s-aşteaptâ sâhăţ unâ dupu alantâ, ama şi niapruchiarea a nomlui mutrinda votlu prit corespondenţâ, cu agiutorlu a curi puteau s-hibâ ascâpaţ di ahtări catandisi.
Sum numa “Victor Ponta scos di pi ipotisi ti exces di puteari prit dânâsearea a alidzerilor”, a premierlui soţial-democrat îi si aduţi câbati că vru s-agiungâ prezidentu prit sabotarea a cetăţen’ilor român’i dit diaspora, magioritar di dreapta, şi că tora nu va s-andreagâ scrutinuri parţiali tu baia giudeţi, câsâbadz icâ hori cari armasirâ fârâ primarl’ii alepţâ tu anlu 2012 şi areştaţ dapoaia ti aruşfeti.
PNL dzâţi ş-că moţiunea di cenzurâ putea s-aibâ ş-alti subiecti, tut ahâti capiti di câbati la adresa a Cabinetlui: slaba guvernari, alâxearea hazardatâ a Codlui Fiscal, atacurili contra ali Giustiţii. Ama aritmetica dit Senat şi Udălu a Deputaţlor nu-ari n’ilâ cu aţei şi ahurhirâ moţiunea. Ta s-hibâ apruchiat, documentul lipseaşti s-adunâ 278 di voturi pozitivi, iara grupurli parlamentari ali PNL au maşi 173 di senatori şi deputaţ. Adunarea a parlamentarilor dit Partidlu Mişcarea a Poplui, ţi-l vreau pi aţel di ma ninti prezidentu, Traian Băsescu, a aţilor vgaţ dit PSD cu aţel du ninti prezidentu, Mircea Geoanâ icâ a-ndauâ sârmi dit formaţiunea populistâ PP-DD nu agiungu ca Ponta s-cadâ.
Tuţ parlamentarl’ii PSD hâbârisirâ că suntu anamisa di caplu a lor. Soţl’ii-giuniori dit Executiv, UNPR, PC şi PLR, “s-bâturâ” şi ei ta ş-aspunâ andruparea, fidelitatea andicra di premier şi adusirâ câbati ali opoziţii că, maşi ti imagini, arucâ vâsâlia t-unâ crizâ politicâ, ţi va s-agiudeascâ greu icunumia şi soţietatea.
Tuti aesti, dzâc analişţâl’ii, aspun unâ niamintari a aliştei moţiuni. Poati s-hibâ treia oarâ cându adunarea executivâ cumândisitâ di Ponta, vinitâ la puteari tu meslu Mai 2012, va s-treacâ di ahtari catandisi.
Ama, ti premier, easti maşi un şcurtu chiro di arâhati. Pitrişearea ali moţiuni, Viniri, fu eclipsatâ di marli scandal ahurhit tu idyea dzuâ, cându DNA hâbârisi că protlu ministru easti câftat penal ti fapti di aruşfeti – arâdeari tu acti, agiutor la evaziuni fiscalâ, lari di pâradz, conflictu di interesi – pi cari Ponta li ari adratâ ahât ninti, ama ş-dupu ţi agiunsi caplu a Guvernului.
Aşi, el easti protlu premier ali Românii post-comunistâ a curi îi si aduţi câbati penalâ cându easti pi ipotisi.
