Cutreambur tu Nepal
Autorităţili di Nepal apruchiarâ catandisi di urgenţâ dupu cutreamburlu di 7,9 gradi Richter, di Sâmbătă, 25 di Apriiur, îngriunat ş-di alti-ndauâ repliţ.
România Internațional, 29.04.2015, 13:21
Tu aestu cutreambur, cama di 4000 di oamin’i chirurâ şi cama di 7500 furâ agudiţ, uidisit cu un raportu adrat tora, di oarâ. Baia chireri materiali avurâ câsâbadzl’ii Kathmandu şi Phokara, iara ligâturli di energii electricâ, di comunicaţii, ama şi reţeaua di Internet furâ asparti. Tu idyul chiro, nica easti mari piricul tu ţi mutreaşti avalanşili ş-lunicărli di loc tu zonili di munti.
Aşi, Ministerlu di Afaţeri Externi lâ caftâ a tutlor cetăţen’ilor român’i s-nu s-ducâ Nepal cara nu lipseaşti, icâ tu regiun’ili viţini dit India, ş-ea aguditâ di cutreambur. Pânâ tora s-aflarâ tu Nepal 28 di cetăţen’i român’i. Tuţ suntu ghini, uidisit cu MAE.
Tutâ planeta s-mută s-agiutâ – dupu greaua catandisi dit Nepal, ma multi vâsâlii pitricurâ echipi di scâpari tu statlu asiatic. Câtâ Nepal şi câtâ Nordul ali Indii s-duc tora baia agiutoari umanitari dit întreaga lumi. Şi prezidentul ali Românii, Klaus Iohannis, pitricu, Duminicâ, zboarâ di andrupari ti victimili dit Nepal: N’i-aspun ponlu, anvirinarea, ama şi solidaritatea andicra di oamin’ii di Nepal. Tu aestu greu chiro, di mari dureari, pitrec condoleanţi a fumeilor ţi ş-chirurâ oamin’i. România easti anamisa di tuti vâsâliili dit lumi cari ş-aspusirâ andruparea ti autorităţili di Nepal ş-dit alanti vâsâlii aguditi di cutreambur.
