Servitiili Români di Informaţii
Protili serviţii di informaţii ali Românie armasirâ, tru aestu chiro, fără directori ţivil’i. După demisia al Teodor Meleşcanu, tru sumedru 2014 şi atea di marţâ, al George Maior, aesti dauă structuri, SRI şi SIE au cumânduseri interimari asiguripsiti di doi generali. Angajamentul di stat membru al NATO cari pruveadi un control ţivil, democratic, ti servitiili di informaţii lipseasti sâ scoatâ tru migdani cât cama ayon’ea, doi şefi ţivili noi la serviţiili secreti români. Aestu lucru va sâ s-facâ, simfun cu nomlu, la pripunirea a prezidentului ali Românie, Klaus Iohannis, cu aprobarea a majoritatil’ei parlamentari şi acordul a CSAT. Tru aestu chiro, demisia a şeflui SRI, George Maior, scoati tru videalâ comentarii apreasi Bucureşti iu, ufiţial, nu s-cânoscu furn’iili trâ cari s-feati.
Valentin Țigău, 28.01.2015, 17:55
Observatorl’i canda suntu, ama simfun’i că fudzearea a directorlui easti stres ligatâ di niapruchearea di cătra Curtea Constituţională a pachetâl’ei di nomuri paranumâsitâ ‘Big Brother’: Nomlu ti ufilisearea a datilor, Nomlu trâ cartelili telefoniţi prepay şi Nomlu a securitatil’e ciberneticâ. Ixichea a aistor, spunea tora ma ninti Maior, adarâ, tru România, un vid di nomuri unic tru 25 di an’i dit soni, di mari piricl’iu trâ securitatea a cetăţean’ilor. Tru arada a l’ei, Curtea Constituţională spuni că, acâ âl’i si bâga zori pân di mardzinâ di partea a SRI, nu apruche nomurli adusi aminti ti furn’ia câ li calcâ pruviderli constituţionali mutrindalui statlu di dreptu şi prinţipiul a legalitatil’ei, cata cum şi aţeali mutrindalui bana intimă, familială şi privată, respectiv secretlu a corespondenţal’ei.
CCR nica aduti furn’ii apofasea prit atea că autoritatea naţională tru dumenea a securitatil’ei ciberneticâ lipseasti s-hibâ un organismu ţivil, tra s-asiguripseascâ aesti ndrepturi, şi nu Centrul Naţional di Securitate Cibernetică, organismu cari lucreadzâ, s-tru aestu chiro, tru arada a SRI, cu personal militar. Di altă parti, deputatlu Cezar Preda, di la Comisia di control parlamentar a SRI, mindueasti că nomurli avigl’eati di George Maior suntu anânghisiti ş-că eali va s-armânâ tru menga a legislativlui.
Ia ţi spuni Cezar Preda: ‘Prezidentul a Comisiil’ei a noastrâ di control a SRI şi liderl’ii a partidilor polititi dimândarâ că vasilia ari ananghi di aesti nomuri şi că eali va s-intrâ multu ayon’ea tru dezbaterea a noastră, aţea turlie câ dinintea a Curtil’ei Constituţionalâ şi dinintea a cathi unlui cetăţean s-nu hibâ pân tru soni un actu normativ cari ngârdeaşti ndrepturli, dimi câ s-hibă un actu normativ cari nâ veagl’e noi tuţ.’ Cundil’em că, după Revoluţia Română dit andreu 1989, nâu discl’isili SRI şi SIE avurâ, până ază, ţinţi şi respectiv 7 directori tru harea di ministru.
(armânipsearea: Taşcu Lala)
