Pruvideri năi ti Codlu a Lucurlui
Român’il’i au, dit 25 di yinar, un nău Cod a Lucurlui, ti s-bagă tru lucru după promulgarea a lui di cătră prezidentul Klaus Iohannis. Asi cum să spuni tru documentu, concediile fără pălteari şi absenţili nimotivati nu mata va s-reprezintă vicl’imi tru lucru. Excepţie va s-facă concediile fără palteari tra pregătirea profesională. Tu ti mutreasti concediile medicali, di maternitati ică tră mutrearea a n’iclui lăndzidu, aestă numata va s-ncheadică numirlu di dzăle di concediu di odihnă la care ari ndreptul un lucrător. Secretarlu di stat tru arada a Ministerlui a Lucurlui, Codrin Scutaru, yini cu ndauă cundil’eri:
Roxana Vasile, 26.01.2015, 13:49
“Ma s-ai, ti exemplu, 21 di dzăle di concediu di odihnă, ninti earai penalizat cu trei dzăli, ma s-nu earai pi lucru doi mesi di dzăli tru concediu medical. Tora, numata va s-eshtsă penalizat, va spot s-ai parti di tută perioadă di concediu di odihnă. Cara di furn’ii ntimil’eati, lucrătorlu nu poate tra s-adară concediul di odihnă integral ică parţial, atumtea, angajatorlu ari borgea să-l’i da concediul di odihnă niadrat ti un chiro di 18 di mesi, ahurhindalui cu anlu ti yini, existândalui, aestă turlie, şansi ma n’it ca vărnu să-şi cheară dzălili libiri. Nu dip tru soni, di simasie easti că tin’ia di cathi mes a unui lucrător temporar nu poati s-hibă ma n’ică andicra di atea a unlui permanentu cari fati idyiul lucru. Easti câtu s-poate di posibil, ama, idyealui ca şi aestu Cod a Lucurlui ndreptu diznău, cât cama ntraoară s-hibă alaxitu prit ună iniţiativă cetăţenească cu şanse mări – tru premieră tră România — s-agiungă nom. Dzălili ti tricura, iniţiativa lo avizlu a Curtil’ei Constituţionala. Liderlu a BNS, Dumitru Costin, declara, tră Radio România, că pripunirli mutrescu s-bagă tu arada alathusili şi s-agiuta şi tinirl’ii s-intră pi lucru.
“Ndreapsim un nău Cod a Lucurlui tru alithea noimă a zborlui, cari s-yină s-aducă echilibru şi tin’ie tru ligaturli anamisa di angajator şi angajat. Aestă iniţiativă a noastră ndreadzi lucurlu ti intrarea pi păzarea a lucurlui, ama tru idyiul chiro scoati ma multi călcari di nom cari suntu tru aestă oara tru nom şi cari agudea prota s-prota tinirlu bărnu. Tru isa misura, yini s-limbidzască ligatura anamisa di angajat si angajator şi nu dip tru soni, s-ducă la transparenţă şi limbidzari pi păzarea a lucurlui dit România.” Simfun cu pruviderli legale, una iniţiativă cetăţenească lipseasti s-hibâ aprucheatâ di un numir di nai puţân 100.000 di insi cu ndreptu di vot dit nai puţân un cirec dit giudeţili a vâsiliil’ei şi dit Bucureşti. Em, proiectul a Bloclui Naţional Sindical adunâ 150.000 di semnături şi avu hiratimati di partea a prezidentului di la Curtea Constituţionala ali Românie, Augustin Zegrean. Populu — spusi nâsu — fu irbapi să s-ascumbuseascâ, s-adună ahât multi semnături şi s-promoveadzâ unâ iniţiativă legislativă di mari sinfer.
(armânipsearea Tascu Lala)
