Dosari di mari simasii mutrinda aruşfetea
România Internațional, 14.10.2014, 11:39
Cu mari avrapâ, Direcţia Naţionalâ Antiaruşfeti ş-duţi ninti ancheta tu ţi mutreaşti multu zburâtlu dosar Microsoft.
Procurorl’ii pot s-ahurheascâ urmărirea di turlii penalâ contra a deputatlui democrat-liberal Valerian Vreme, dupu ţi, Luni, cu 153 di voturi ti şi 110 contrâ, Camera a Deputaţlor pitricu un zbor pozitiv mutrinda aţea ţi câftarâ ei.
Ministru di ma ninti la Comunicaţii, întrâ an’ii 2010 şi 2012, ş-tora tu opoziţii, al Vreme îi si aduţi câbati ti abuz tu lucru, tu marea ancheta ţi mutreaşti posibila ancupârari paranom di licenţi Microsoft.
Uidisit cu DNA, tu chirolu a mandatlui a lui di ministru, fu anyrâpsit un acordu di ancupârari a cama di 179 di n’ii di licenţi ti sculiili dit Românii, cu vârâ 73 di n’ii mai multi andicra di numirlu a computerilor ti cari s-uidiseau programili la aţea oarâ.
Aestu contractu ari adusâ a Statlui dauni ţi trec di 5 milioani di euro. Spunândalui câ easti unâ victimâ a nâscântor acuzaţii fârâ di timel’iu, Valerian Vreme nu apruchie, di la tribuna ali Camerâ a Deputaţlor alegaţiili şi dzâsi că tuti documentili ţi li anyrâpsi el au avutâ asistenţâ di turlii giuridicâ di specialitati di partea a departamentilor di profil, andruparea tehnicâ di timel’iu şi tuti avizili ţi lipseau.
Armâni tora sâ-i cândârseascâ ş-pi procurorl’ii anti-aruşfeti, idyea cu alţâ optu minişţrâ di ma ninti, dit partidi şi guvernări dintrâ an’ii 2001 şi 2012, ahât di stânga, ama şi di dreapta, a curi numi suntu zburâti, şi eali, tut tu aestu dosar.
A lor lâ si poati aduţi câbati ti trafic di influenţâ, lari di pâradz, abuz tu lucru icâ aruşfeti. Tu catandisea tu cari, tu Românii, salarlu minimu pi icunumii easti ma n’ic di 200 di euro, nâscânţâ minişţrâ au luatâ comisioani di milioani tu cazlu a unui altu contractu întrâ Guvernul di Bucureşti şi Fujitsu Siemens Computers, societati cari, s-aspusi, la anyrâpsearea a documentului, ca unic distribuitor di licenţi Microsoft.
Tu minduita ali Direcţii Naţionalâ Antiaruşfeti, dit aţeali 54 di milioani di dolari pâltiti di Executiv, 20 di milioani furâ comisioani câftati di oamin’ii implicaţ tu contractu.
Prezidentul Traian Băsescu apruchie ca DNA s-ahurheascâ urmărirea di turlii penalâ contra a ţinţi dit aţei nauâ minişţrâ. Senatlu di Bucureşti va s-pronunţâ tu catandisea a altor doi, iara Parlamentul European lipseaşti s-anchiseascâ tu unâ acţiuni idyea la adresa a unlui, tora deputat la Bruxelles.
