Ligâturli guvernamentali româno-israelieani
Guvernili român şi israelian ş-l’ia borgea tra s-lucreadzâ deadun tru dumeniili tră afaceri externi, apărari, securitati, economic ili cultural. Easti, tru esenţă, rezultatlu ali andamusi comunâ prezidatâ, marţâ, Ierusalim, di premierl’ii Victor Ponta şi Benjamin Netanyahu. Easti unâ pirifan’e — cundil’e şeflu a Executivlui di Bucureşti — ca adetea a ligâturlor politiţi bilatearali să s-ducâ ma largu. Membri a aţilor dauă guverni simnarâ 14 di achicâseri bilatearali, s-cl’eamâ câ da unâ perspectivă pozitivă ti coopeararea, ntră altili, tră vigl’earea a fisil’ei, tehnologhie icâ cercetari. Tru isa misurari — adâvgă premierlu Ponta — Israelu easti unâ urnechi trâ lumea tută tru inovaţie şi investiţii tră noi tehnologhii.
Roxana Vasile, 25.06.2014, 16:51
Anamisa di aţeali 14 di achicaseri simnati, unâ spuni tră recrutarea a lucrătorlor români tru dumenea a construcţiilor. Diznău, Victor Ponta: 1.000 di lucrători tru construcţii pot, unâ ş-unâ după bâgarea tru practico, s-aibă izini pi pâzarea a lucurlui dit Israel tru condiţii multu buni. România şi Israelu va s-lucreadzâ deadun şi tră dezvoltarea a nâscântor capacităţ româneşti di producţie dit industria aeronautică şi di apărari, ama şi tru energhie, chimie, petrochimie, logistică, infrastructură şi IT.
Ministurlu ali economie, Constantin Niţă, pârâstisi a omologlui Naftali Bennett posibilităţli di colaborari şi dizvoltari di proiecti comuni: Un ditru dumen’ili tră cari avem sinfer easti aţel aeronautic, tră aţea că Israelu ari unâ bună experienţă tru aestâ dumeni. Noi avem ndauâ companii cari, au experienţă tru România: Romaero, Avioani Craiova, IAR Ghimbav, companii cari pot, deadun cu aâeali israelieani, s-aibâ unâ creaştiri ti nâscânti proiecti. Tutunâoarâ, ndreapsim proiecti tru dumenea ali energie niconvenţionalâ şi regenerabilâ.
Tru ţi mutreaşti viţepremierlu şi ministurlu a culturâl’ei, Kelemen Hunor, aestu diznău adusi aminti tră proiecti ambiţioasi di coopearari culturală: Furâ apridusi anvârliga di 50 di cărţâ dit limba ebraică tru limba română, ti amârtie ma puţâni cărţâ furâ apridusi dit română tru ebraică. Tru dumenea a teatrilor, a gioclui, a artilor şi spectacolu ari unâ colaborari streasâ. Tru dumenea ali cinematografie avem un acordu simnat tră sâ s-da curayiu ti coproducţiili ţinematografiţi şi easti di mari simasie, ti furn’ia câ filmul românescu şi aţel dit Israel cunoscu unâ perioadă bună, nica şi cu succţesi remarcabili.
Dauli guverni, român şi israelian, şi spusirâ nâdia tră co-existenţa irin’aticâ a Israelui cu viţin’ili a lui, tru contextul tru cari nâpoi şi spusirâ angajamentul tra s-lucreadzâ deadun ti stabilizarea a regiunil’ei şi ndridzearea irin’eatică a conflictilor. Tru aestâ noimâ, premierlu Victor Ponta lu asiguripsi omologlu Benjamin Netanyahu ti agiutorlu ali Românie mutrindalui aflarea a nâscântor cearei cari s-ducă la dialog şi la bagarea tru lucru a unlui climat di securitati şi irini tru Orientul di Mesi. România şi Israelu va s-lucreadzâ deadun, tutunâoară, tră curmarea iţi turlii di antisemitism, discriminari rasială, xenofobie şi intoleranţă.
Armânipsearea: Tascu Lala
