Bucureşti, tră apărarea europeană
România easti un agiucător strateghic multu importantu, maxus tru catastisea di tora di securitate dit zonă, declară, marţă, Bucureşti, directorlu executiv ali Agenţie Europenâ di Apărari (EDA), Claudi France Arnauld.
România Internațional, 11.06.2014, 12:11
Easti prota vizită tru România a unui analtu ufiţial european pi cumata di securitate şi apărari după un chiro lungu, cundil’e ministurlu ali apărări, Mircea Duşa.Tru actualu contextu geopolitic şi a crizâl’ei dit Ucraina, aţel’i doi feaţira moeabeti, ntră altili tră agiutorlu ali Agenţie Europenă di Apărare dat tră statili dit UE, nica şi România, tră modernizarea ali industrie di apărare.
Arnauld spusi câ Agenţia ari tru scupo unâ industrie di apărare vârtoasă tru cari s-hibă mintiti tuti vâsiliili membri, furn’ie tră cari Agenţia Europenâ di Apărari ţâni tru idyea scarâ şi li creaşti tuti programili di cercetare şi dizvoltare tehnologică. Di altâ parti, el nâpoi adusi aminti ananghea ti ahurhearea diznău a trendului ascendentu a hărgilor di apărari tru vâsiliili europene. Ministrul Duşa deadi hâbarea a ufiţialui european câ România ndreapsi un buget di apărari cari s-agiungă la 2% dit PIB până tru 2016. El spusi că dit semestrul 2 a aluştui an MApN va s-hârseascâ di unâ rectificari bugetară pozitivă, aţea turlie tra s-poată s-ducă ma largu şi s-dizvârteascâ programili di ndridzeari şi modernizari ali Ascheri Românâ.
Duşa nâpoi adusi aminti vrearea a Bucureştiul tra s-acaţâ tru isapi industria naţionalâ di apărari anamisa di programili europeani dizvartiti sum egida ali Agenţie Europenâ di Apărari. Ia ţi spuni Mircea Duşa track: Europa lipseaşti tra s-anvartuşeadzâ industria di apărare, iara vrearea a noastră easti câ ti bâgarea tru lucru a axizerlor militari europeani s-hibâ acâţati tru isapi şi ntreprinderli cari au profil tră industria di apărari tru aestu program”.
Chestiunea ti criştearea a bugetilor militari a vâsiliilor europeani fu zburâtâ, tut marţâ, di secretarlu general al NATO, Anders Fogh Rasmussen, tru chirolu a unei conferinţi ţânutâ Bruxelles. El şi spusi umutea că, la summitlu ali Alianţâ dit yismâciuni, liderl’i a vâsiliilor NATO va s-vuluseascâ unâ declaraţie tru cari va lu spunâ di unâ parti angajamentul american andicra di securitatea ali Europa, iara di alantă parti angajamentul european andicra di unâ ampărţari tinţisită a hărgilor şi a borgilor.
Simfun cu datili NATO, tru ţinţil’i an’i Rusia li criscu cu 50% hărgili militari, chiro tru cari statili NATO li n’icşurarâ cu 20%. Anlu ţi tricu, maşi Statili Uniti, Marea Britanie, Gârţia şi Estonia ahârdzirâ ti apărari naima pţân 2% dit PIB, aşi cum caftă Alianţa. România, Polonia, Lituania şi Letonia dimândară ama că va li creasca bugetili tră apărari.
Armânipsearea: Taşcu Lala
