Alidzerli europarlamentari – tru linie dreaptă
Tru România, s-intră tru linie dreaptă cu alidzerli europarlamentari dit 25 mai, ama ici ţva nu spuni unâ dinamică ahoryea a campaniil’ei i criştearea a sinferlui public tră scrutin. Stepsul easti a partidilor, cari li mutrirâ alidzerli tră legislativlu ali UE maş ca unâ lişoară angâldzari ninti di scrutinlu prezidiţial dit meslu brumar. Tu aestâ catastisi, rezultatili antiţipati dit sondaji nu au cum s-agiungâ pi alâxeri dramatiţi. Asi cum spuni sondajlu CSCI, dizvârtit tru chirolu 12-14 mai, pi un eşantion di 1800 di oamin’i şi avândalui unâ alatusi di 3,1%, alianţa electorală PSD-UNPR-PC, grup di stânga ţi easti tru amprotusa tru majoritatea guvernamentală, easti pi protlu loc tru vrerli a român’ilor, cu 41%. Dupu ea yin formaţiuni di centru-dreapta, PNL15%, PDL cu 12 proţenti, pro-prezidenţialu Partid Minarea Populară, 9%. Tru legislativlu comunitar nica poati s-intra UDMR, ţi easti la co-guvernari, creditat cu 6% dit naeţli di vot.
Ştefan Stoica, 19.05.2014, 12:04
Unâ isapi adrată di Institutlu tră Politiţ Publiţi, niguvernamental, spuni că aproapea giumitati dit mandatili ţi âl’i si cad ali Românie pot s-agiungâ la gruplu a socialiştilor, la cari PSD easti afiliat. Cătră Partidlu Popular European va s-ducâ, simfun cu isapea, reprezentanţâl’i a PDL, UDMR şi nai probabil a Partidlui Minarea Popularâ. Pi isăchili di tora, aţeali trei partidi româneşti pot s-pitreacâ tru legislativlu european nauă eurodeputaţ. Institutlu trî Politiţ Publiţi scoati tu migdani că aestă campanie electorală nu alâxi, multu di multu, opţiunile politiţi a alegătorlor niţi la nivel european, niţi tru România. Organizaţia spuni că acaţâ tru isapi sondajili nai cama pistipsiti dit vâsiliili europeani, iara rezultatlu lugursit a alidzerlor tră PE armâni multu stres anamisa di proţl’i competitori, 28% PPE şi 27% tra Socialişti.
Tru aesti condiţii, Institutlu tră Politiţ Publiţi pistipseaşti câ agiundzi inevitabilă unâ componenţă ali Comisie Europena rezultată dit coabitarea a protilor dauă grupuri politiţi ţi va s-azvingâ, la cari s-hibă câlisitâ şi Alianţa a Liberalilor şi a Democraţlor Europeni — ALDI, la cari dit România easti afiliat PNL. S-aşteaptâ câ Socialiştil’i şi Popularl’ii să-şi ampartă aţeali trei funcţii importanti, prezidentul ali Comisie Europenâ, prezidentul a Consiliului European şi ipotisea di Analtu Reprezentantu ali Uniuni tră afaceri externi şi politica di securitate, tru un format di 2+1, andicra di rezultatili amintati la alidzeri. Chirearea andicra di actuala legislatură poati sâ u aibâ Alianţa a Liberalilor şi a Democraţlor Europeni (ALDI), treilu grup ma mari pi arada, ama şi conservatorl’ii şi verdzâl’i, antiţipeadzâ Institutlu tră Politiţ Publiţi. Tru ţi mutreaşti formaţiunile cari s-angrâpsescu tru curentul eurosceptic şi aţel radical, aeşţâ armasirâ tru idyea scarâ tru preferinţili a electoratlui la idyiul nivel ca aţel ţi eara ninti di campania electorală, faţi timbihi Institutlu di Politiţ Publiţi.
Armanipsearea: Tascu Lala
