100 di dzâli pânâ la alidzerli europeani
Sţena politicâ româneascâ easti aputrusitâ di frenezia a an’ilor electorali. Cum tu 2014 suntu aştiptati şi alidzerli ti Parlamentul European, tu Maiu, ama şi aţeali prezidenţiali, tu Brumar, partidili şi suţatili ş-caftâ locuri cama buni, se aspargu, iara yin deadun, dupu cum lâ si-andreadzi. Cu un suţatâ bunâ, di sucţes tu 2012, cându amintâ alidzerli leghislativi cu aproapea 70% dit voturi, Uniunea Social-Liberalâ s-pari că nu mai ari banâ lungâ.
România Internațional, 12.02.2014, 11:54
Aţeali dauâ partidi mări dit suţata guvernamentalâ, PSD şi PNL, adarâ parti dit niscânti fumel’i” politiţi europeani ayoriea şi ti aţea, la euroscrutin, va s-yinâ cathi un pi câti unâ listâ. Ma multu, PSD adră tora ayoniea tu Uniunea Soţial-Liberalâ unâ Uniuni Social-Democratâ. Partidlu a premierlui Victor Ponta luâ ninga el, nâinti di alidzeri (şi lâ deadi ipotisi cama buni) parteneri ma n’iţ di la guvernari: UNPR, adratâ cu an’i nâinti di dizidenţâ soţial-democraţ, şi PC, pânâ tora ayoniea soţ a liberalilor tu Alianţâ di Ţentru Dreapta, aspartâ – nu di multu chiro. Di la fondari, cu puteari s-treacâ di praglu electoral di 5%, aesti dauâ n’iţ partidi nu cher, câ ţe suntu agiutati di nai ma marea formaţiuni politicâ di tora. Cu, icâ fârâ aliaţi di aestâ turlii, PSD ari tu sondaji cama di 37% dit voturi şi poati s-li’a 10-12 dit aţeali 32 di mandati di eurodeputaţ dit locurli ali Românii tu Parlamentul di Bruxelles.
Doilu numir a suţatâl’ei guvernamentalâ, PNL, easti aproapea di 20 di proţenti dit voturili electorali şi armâni tut doilu pi sţena politicâ. S-pari că liberal’ii suntu tut ma nanâparti, tu un chiro cându lâ lipseaşti nai ma multu s-aibâ îndoi soţ, câ ţe liderlu a lor, Crin Antonescu, ta s-hibâ aleptu prezidentu, lipseaşti s-aibâ andruparea al PSD. Dupu arupearea a suţatâl’ei dintrâ democrat-liberali şi aţel di ma ninti şef a lor, prezidentul Traian Băsescu, s-avdzâ ca aestu dit soni ari ligâturi cu ma multi partidi înhiinţati tora ayoniea — Mişcarea Popularâ, Putearea Ţivicâ, Naua Republicâ.
Ligat şi el la Partidlu Popular European, niţi vecl’iu UDMR nu ari ma multu di 4,7% dit voturi tu sondaji. Ama, tuti pisti tuti, dzâc analişţâl’ii, el ari voturi di la un electorat ordonat, întimil’iat pi considerente di turlii etnicâ, cari, cât mari s-hibâ anvirinarea andicra di reprezentanţâl’ii a lor, şi-adunâ puterli la cathi scrutin şi amintâ s-pingâ Uniunea ta s-treacâ praglu.
