Unâ vizită diplomatică
Aliată, ufiţial, tru arada ali NATO şi, pi teren, tru Balcani, Afganistan şi Irak, ligată di Washington prit un parteneriat strateghic, nicuchirâ a nâscântor importanti investiţii economiţi şi instalaţii militari a Statilor Uniti, România easti, nica şi pi nivelu ali opinie publică, unâ di nai cama pro-americani vâsilii dit Europa. Ti atea, yinearea Bucureşti a emisarlor ufiţiali americani au, di adeti, unâ fortumâ ahoryea pi agenda a diplomaţiil’ei români.
Bogdan Matei, 13.01.2014, 13:45
Nu feaţi excepţie niţi vizita dit stămâna ţi tricu a adjunctului secretarlu di stat, Victoria Nuland, ţi nchisi tru unâ voltâ europeană cari acâţă tru isapi nica şi Germania, Franţa, Olanda şi Lituania, dimi tut ahântâ aliaţ di simasie ali Americă. Di arada complezentă, ma cu francheţe anamisa di ţiva soţ, d-na Nuland nu ascumsi gailelu ti bunâ a Statilor Uniti andicra di tin’isearea tru România a prinţipiilor tră statlu di dreptu. Aşi cum spun analiştil’i, formula mutreaşti câtâ aşi spusa tentaţie a majoritatil’ei parlamentarâ dit aestu chiro di Bucureşti tra sâ u ngârdeascâ libirtatea a presâl’ei şi, maxus, prerogativili a justiţiil’ei şi tra s-adarâ unâ supra-imunitati tră politicieni. Victoria Nuland:
“Aşi cum presa libiră easti unâ hâlati di thimel’iu ti unâ democraţie vârtoasâ şi dinamică ti da apandisi la anânghiserli a cetăţen’ilor a l’ei, idyealui unâ justiţie independentă easti di mari simasie tră unâ democraţie vârtoasâ şi cum pistipseari. Tânearea ahoryea a puterlor tru administraţie easti di thimel’iu tră unâ democraţie vârtoasâ. Dimec, easti gâilipsitor cându s-agudeaşti tru independenţa ali justiţie, cându politiciean’l’i dit iţi partid minduescu s-cârteascâ independenţa ali justiţie, easti unâ temă ţi u avem tru mengâ iuţido tru lume.”
Pi ningâ responsabili politit di prota thesi, ntră cari preşedintele Traian Băsescu, ufiţialu american orlea zorlea vru tra sâ zburascâ ti problemele a sistemlui judiciar şi cu caplu ali Direcţiei Naţionale Antiaruşfeti, Laura Codruţa Kovesi. Ca amfitrion a d-nâl’ei Nuland, ministurlu di Externe, Titus Corlăţean, nâpoi adusi aminti di tin’isearea a Executivlui român andicra di valorli democratiţi:
“S-limbidzârâ nâscânti lucri, şi aestâ confirmă că Guvernul andrupaşti multu limbid anvârtuşearea a statlui di dreptu tru România. Pot s-iasâ tu migdani accidente tu imnaticlu a nâscântor state democratiţi tru Europa, dimec s-faţi tru iţi democraţie europeană. Parlamentul ari personalitatea a lui, ma nu va s-dzcâ că tut ţi apufuseaşti Parlamentul orlea zorlea esti andrupât di Guvernu.” Corlăţean nica spusi că, anaparti di tema a statlui di dreptu, moeabeţli a lui cu ufiţialu american tricură tru revistă tuti dosarili majori a raporturlor bilaterali, di la parteneriatlu strategic la ligâtura economică.
Autor: Bogdan Matei
Armânipsearea: Taşcu Lala
