Anlu Sportiv 2013
Tin’isiţ ascultători, triţem tru revistă, ma nghios, protili evenimente sportivi a partil’ei a daua a anlui 2013. Aieri vâ zburâm ti ateali ţi s-feaţirâ tu proţl’I şasi meşi a anlui, bitisindalui cu debutlu a imnaticlui ti anami a agiucâtoaril’ei di tenis Simona Halep tu circuitlu WTA.
Florin Orban, 31.12.2013, 12:55
Tin’isiţ ascultători, triţem tru revistă, ma nghios, protili evenimente sportivi a partil’ei a daua a anlui 2013. Aieri vâ zburâm ti ateali ţi s-feaţirâ tu proţl’I şasi meşi a anlui, bitisindalui cu debutlu a imnaticlui ti anami a agiucâtoaril’ei di tenis Simona Halep tu circuitlu WTA.
După victoriile di Nürnberg şi s’Hertogenbosch, Simona agiucă la Wimbledon. Işi dit turneu după turlu doi, câte chiru ditintea ali chinezoaică Na Li, numirlu 6 mondial.
Vini victoria di Budapesta, iu premiile eara tut cu tut 235 di n’il’i di dolari. Tru finală, românca amintă cu 6-3, 6-7, 6-1 dinintea ali austriacă Yvonne Meusburger şi agiumsi a daua agiucătoare dit lumi la numirlu di turnee amintati tru 2013, după Serena Williams.
Tru augustu, scrimerl’ii români s-turnară cu trei medalii di la Mondialele di Budapesta. Tiberiu Dolniceanu, la sabie individual, şi echipa feminină di spadă amintară medalii di brundzu. Tu antritearea a echipilor masculine di sabie, România agiumsi vicecampioană mondială.
Viniră a Campionatele Mondiale di atletism di Moscova. Delegaţia a Româniil’ei, compusă dit 15 sportivi, nu amintă niţi ună medalie. Nai cama bună performanţă românească fu loclu 6 acâtat di Marian Oprea la triplusaltu, cu un rezultat di 16 meatri şi 82 di centimeatri.
Tut tru agustu, Simona Halep agiumsi tru protili 20 di agiucătoare di tenis a lumil’ei. Ea agiumsi pi loclu 19 WTA după ti amintă turneulu dit localitatea New Haven, statlu american Connecticut, cu premii tut cu tut 690.000 di dolari. Halep u azvimsi tru finală cehoaica Petra Kvitova, cap di serie numirlu 3, cu 6-2, 6-2.
Meslu yismâciuni ahurhi cu medalii. Sportivele dit România alinarâ di doauă ori pi podium la Campionatele Mondiale di canotaj dit Coreea di Sud. Prota, echipajlu di doi rame fără cârmaci, compus dit Nicoleta Albu şi Roxana Cogianu, acâtă loclu doi tru finală, după ambarcaţiunea ali Marii Britanii. Tut medalii di asimi amintarâ şi featili dit ambarcaţiunea di 8+1, şi dimec Cristina Ilie, Nicoleta Albu, Cristina Grigoraş, Ioana Crăciun, Camelia Lupaşcu, Andreea Boghian, Roxana Cogianu, Ionelia Zaharia şi Daniela Druncea. Titlul mondial lu amintă Statili Unite.
Tut tru yismâciuni, echipa di handbal feminin HCM Baia Mare, vicecampioana ali Românie, aprâftâsi calificarea tru Liga a Campionilor. Pareia dit Maramureş amintă turneulu preliminar la cari fu nicuchirâ şi la cari nica loarâ parti pareili daneze Viborg şi Holstebro, deadun cu pareia olandiză Dalfsen.
La Anvers, în Belgia, s-ţânu, tu nhisita a meslui sumedru, Campionatele Mondiale di gimnastică artistică. Delegaţia ali Românie amintă unâ medalie di brundzu, prit Larisa Iordache, tru proba feminină di sol.
Tut tru sumedru avum năi performanţe tru tenis. Tru turneulu ATP di Beijing, la dublu amintă preacl’ia adrată dit tenismanul român Horia Tecău şi bielorusul Max Mirnîi. Atel’I doi amintară finala dinintea a italiean’ilor Fabio Fognini şi Andreas Seppi, cu 6-4, 6-2.
Deapoa, Moscova, Simona Halep amintă ţinţilu a l’ei turneu WTA dit carieră, azvingândalui tru finală, dinintea a agiucâtoaril’ei australieană Samantha Stosur cu 7-6, 6-2. Neise, preacl’ia adratâ dit tenisman’il’i român Florin Mergea şi ceh Lukas Rosol amintară proba di dublu a turneului ATP di Viena. Tru finală, el’i azvimsirâ cu 7-5, 6-4 preacl’ia adrată dit austriaclu Julian Knowle şi canadianlu Daniel Nestor, cap di serie nr. 3. Florin Mergea amintă aşi protlu a lui titlu ATP dit carieră.
Meslu brumar adusi ti Simona Halep unâ nauâ victorie. Ea amintă Turneulu a Campioanilor di Sofia, competiţie cari lu bitisi sezonul WTA şi cari deadit, tut cu tut premii di 750.000 di dolari. Halep u azvimsi tru finalâ australianca Samantha Stosur, aestâ aradâ tru trei seturi: 2-6, 6-2, 6-2, şi bitisi pi loclu 11 tru clasamentul WTA.
Tut tru brumar s-bitisi şi imnaticlu a pareiil’ei femininâ di handbal HCM Baia Mare tru Liga-a Campionilor. Tu aţel dit soni agioc a fazâl’ei tru grupili a Ligâl’ei a Campionilor, di Györ, vicecampioana română fu multu aproapea di nai cama marea surpriză a sezonului. Tru finalâ ama, HCM chiru cu 26 la 28 dinintea a pareiil’ei locale, Audi ETO, dupa ţi, ma multi ori arada, eara prota pi tabela di marcaj. Agiumtâ pi loclu dit spni tru grupa A, Baia Mare işi dit competiţii.
Nai cama di simasie evenimentu sportiv a meslui andreu fu Campionatlu Mondial di handbal feminin, dizvârtitu tu Sârbie. Ti amârtie, agiucătoarili tricolori işirâ ayon’ia dit antriteari dupu ţi chirurâ tru optimile di finală dinintea ali Polonie.
Vruţ ascultători, retrospectiva sportivă a anlui 2013 s-bitiseaşti aoa. Avem nâdia câ 2014 va s-hibâ un an ma bun em ti Dumniiliavoastri, ascultătorl’ii di la RRI, em ti sportul românesc.
Autor: Florin Orban
Armânipsearea: Taşcu Lala
