100 de an’i di ligaturi bilaterali anamisa di Romania si Albania
Umplearea 100 di an’i di la apufusearea a ligâturlor diplomatiţi anamisa di România şi Albania fu yiurtusitâ azâ 16.di Andreu 2013 Bucureşti la Ministerlu tră Lucri Xeani.
Tașcu Lala, 16.12.2013, 15:33
Ambasadorlu albanez la Bucureşti, Sami Shiba, spusi că ligâturli bilaterali anamisa di România şi vâsilia a lui furâ apufusiti ti şcurtu kiro după ţi Albania ş-declară independenţa.
“Azâ tin’isim contribuţia ali Românie, unâ vâsilie cari ndrupâ Albania, unâ vâsilie tu cari comunitatea albaneză avu un rol di mari simasie ti ndridzerli tră proclamarea a independenţâl’ei ali Albanie. (…) România deadi nu maşi agiutor politic, pân di mardzinâ, hiindalui prota vâsilie cari pricunuscu independenţa ali Albanie, ama şi un importantu agiutor financiar ti protlu guvernu albanez”, spusi Sami Shiba.
El cundil’e că România easte un aliat ali Albanie tu arada NATO şi un partener importantu ti imnaticlu a l’ei câtrâ integrarea europeană.
“Voi s-cundil’edzu că, tu harea di nai vecl’i populi dit reghiunea a noastră, român’il’i şi albanezl’i ţânurâ cheptu la idyili provocări tru istorie. Mira comună li apruche, di scoasi tu migdani unâ tradiţie cari li apruche adeţli a populilor a noastri, culturli şi mentalităţli, existândalui multi uidiseri/ similarităţ ambârţitati şi cu alti populi dit Balcani”, adăvgă ambasadorlu ali Albaniei la Bucureşti.
Viţeprezidentul a gruplui parlamentar di suţâl’e cu Albania, Oana Manolescu, spusi că, tru minduita a l’ei, albanezl’ii dit România reprezintă minoritatea cari s-integră nai cama ghini tru vâsilia a noastră .
“Ari vreari spirituală nu maşi anamisa di doi oamin’i icâ grupuri n’iţ di oamin’i, ari atracţie spirituală anamisa di naţiun’i, populi, nâscânti ori hiinda anamisa şi vecl’ili arâdâţin’i comune. Easti şi cazlu a populilor albanez şi român, dit vecl’iul chiro, ama vârtoasi arâdâţin’i comuni traco-daco-geto-ilire. (…) Ligâturli diplomatiţi anamisa di Albania şi România, ligâturi cari tru 2013 umplu 100 di an’i, suntu încurunarea ofiţialâ a ligăturlor di cama di dauă n’il’i di an’i a aţilor dauâ populi”, spusi deputatlu.
Secretarlu di stat dit MAE Radu Podgorean spusi că “yiurtusearea a ţentenarlui tră ligâturli bilaterali ndreapsi cadurlu oportun tră ună nauă abordari tu arada a gaereţlor di anvârtuseari a ligâturlor bilaterali”.
Tu arada a teremoniil’ei ţânura un zbor nica şi:
Gheorghe Micu ambasadorlu ali Românie la Tirana tu chirolu 1990- 2009
Marius Dobrescu, redactor shef a revistâl’ei Prietenul Albanezului”
Scriitorlu Fahri Balliu cu angrâpseri şi apriduţeri dit literatura a daulilor populi.
Academicianlu Grigore Brâncuşi ţi cundil’e simasia a comunitatil’ei armâneascâ dimi a armân’ilor fârşiroţ dit Albania ca hiindalui unâ apunti anamisa di dauli populi.
Cu aeastâ furn’e, MAE dişcl’isi unâ expoziţie di cărţâ şi documenti cari yilipsescu istoriclu a ligâturlor anamisa di România şi Albania:
– De la românii din Albania” di D. Burileanu
– Albania” di D. Abeleanu
– Aspecte din Albania” di Vlad Bănăţeanu
– Despre Abania şi Albanezi” di Gelcu Maksutovici
– Abania şi România” di N. Iorga
– Istoria Albaniei” di Kopi Kucyuku
– Istoria Comunităţii Albaneze din România” di Gelcu Maksutovici
– Gheorghe Kastriotul Skanderberg şi lupta albanezo-turcă în secolul al XV — lea
– Mişcarea naţională Albaneză” di Dumitru Polena
16.12.2013
Tascu Lala
