Nomlu mutrinda minili nu fu apruchiat
Deadun, Camera a Deputaţlor nu apruchie proiectlu di alâxeari a Nomlui a minilor, dupu ţi, cu maşi unâ dzuâ ninti, niţi Senatlu nu lu-apruchie. Unâ pisti alantâ, proiectul mutrea ca tu exploatărli dit Românii s-nu hibâ ufilisiti tehnologii cari s-aspargâ mediul, ama cari, tutnâoarâ, s-hibâ nai ma bunili turlii di scuteari a minireurilor. Gruplu parlamentar al PNL, formaţiuni di la puteari, andrupâ proiectul. Deputatlu Răzvan Mironescu pistipseaşti că aestu proiectu easti bun ş-ti cetăţen’i, ama şi ti icunumii: Lucurlu a nostru ari puterea ta s-aspargâ tut ţi easti paranom icâ piriculos tu industria a minereurilor şi poati s-agiutâ ti unâ exploatari cama bunâ, efiţientâ a resursilor naturali dit vâsâlia a noastrâ, ufilisinda nai ma năili tehnologii tu cathiunâ domeni. Pi di altâ parti, proiectul di alâxeari a Nomlui a minelor fu multu zburât şi giudicat di partidili dit opoziţii.
România Internațional, 11.12.2013, 12:53
Prit aţei ţi nu apruchiarâ proiectul fu şi deputatlu PDL, Lucian Bode: Tu aestu proiectu legislativ, niţi apa di izvor nu ascapâ di impozitarea a Guvernului. S-caftâ pâradz şi ti ea! Nu apruchiem niţi amendamentili ţi mutrescu fondul ti pâduri, căl’iurli di intrari şi tut aşi. Nomlu a minilor nu agiutâ interesili ali Românii – dzâsi şi deputatlu independentu Vasile Oajdea: Easti un nom cu mări piriculi. El agudeaşti baia dit interesili a cetăţen’ilor, nu da îndreptul la proprietati, ma multu, agiutâ la interesili a xen’ilor, a mărilor corporaţii şi ti aţea pistipsescu că nu lipseaşti s-hibâ apruchiat. Tora ayoniea, România Libirâ exiyisea că năili privideri dit proiectul a Nomlui mutrinda scutearea a minereurilor lipsea s-aspunâ ţiva şi ti activitatea di la Roşia Montanâ.
Cu tuti că nu ari niţi un zbor mutrinda aestâ exploatari dit ţentrul ali vâsâlii, niţi chiola tu titlu – dzâţea publicaţia – proiectul reglementa şi scuterli di malamâ şi asimi “di interes public ayoriea”, angrâpsiti ca ‘proiecti prit cari sâ scot cathi an ma multu di ţinţi toni di malamâ”. Ori, maşi un exploatari intrâ cu tut tu aestâ categorii — aţea di la Roşia Montanâ, iu firma canadianâ Gold Corporations estimeadzâ că va s-ascoatâ 15 di toni di malamâ tu cathi an, ufilisinda unâ mari cantitati di cianuri. Dit Yismârciun, cathi Duminicâ, tu capitalâ furâ mări protesti ali opozanţâlor a proiectului minier.
