România şi calea europeanâ a Republicâl’ei Moldova

Calea câtâ Evropa a Chişinăului s-pari ca easti fârâ turnari şi easti, tu idyul chiro, ghini andrupâtâ di Bucureşti, cari u veadi ca hiindaei goala soluţii ti yinitorlu a aţil’ei di ma ninti republicâ sovieticâ, majoritar romanofonâ. Tu aestâ catandisi, ministrul român di Externi, Titus Corlăţean, adrâ, Marţâ, unâ vizită tu Moldova, iu s-andamusi cu omologlu a lui, Natalia Gherman, ama şi cu premierlu Iurie leancă. Moaubetea fu ti lucrul deadun, maxus tu domeniili: energetic, infrastructurâ, educaţii şi asistenţâ medicalâ di urgenţâ, ama şi ti meatrili di andrupari a Republicâl’ei Moldova tu calea a ei europeanâ.

România Internațional, 20.11.2013, 11:43

Calea câtâ Evropa a Chişinăului s-pari ca easti fârâ turnari şi easti, tu idyul chiro, ghini andrupâtâ di Bucureşti, cari u veadi ca hiindaei goala soluţii ti yinitorlu a aţil’ei di ma ninti republicâ sovieticâ, majoritar romanofonâ. Tu aestâ catandisi, ministrul român di Externi, Titus Corlăţean, adrâ, Marţâ, unâ vizită tu Moldova, iu s-andamusi cu omologlu a lui, Natalia Gherman, ama şi cu premierlu Iurie leancă. Moaubetea fu ti lucrul deadun, maxus tu domeniili: energetic, infrastructurâ, educaţii şi asistenţâ medicalâ di urgenţâ, ama şi ti meatrili di andrupari a Republicâl’ei Moldova tu calea a ei europeanâ.

Caplu ali diplomaţii româneascâ adusi aminti di agiutorlu ţi va-l da România ti integrarea a Republicâl’ei Moldova tu UE şi dzâsi că Bucureştiul va s-hibâ şi dit 2014 anamisa di Chişinău tu ţi mutreaşti aestu scupo. Titus Corlăţean s-dusi Chişinău cu furn’iea a Summit-lui a Parteneriatlui Estic di Vilnius ţi s-aproachi (28-29 Brumar), iu Rep. Moldova va s-simneadzâ acordurli di asociari cu UE. El pistipseaşti că aestâ andamusi va s-hibâ un sucţes, iara calea câtâ Vestu a Chişinăului easti dişcl’isâ. Titus Corlăţean:”România mutreaşti tut proceslu di asociari di turlii politicâ şi icunumicâ a Republicâl’ei Moldova tu logica a unâ yinitoari intrari tu Uniunea Europeanâ.” Pi di altâ parti, oficialu român alâvdă eforturili ţi li adră guvernul moldovean tu ţi mutreaşti planlu di meatri murinda liberalizarea a regimlui di vizi ti cetăţen’ii moldoven’i tu UE. Easti un mari pas câlcat câtâ ninti ţi lu adarâ Republica Moldova”, dzâsi Titus Corlăţean.

Raportul ali Comisii Europeanâ şi concluziili di tora ayoniea prezentati Bruxelles mutrinda scutearea a vizilor furâ buni, ama s-aproachi unâ apofasi di turlii politicâ la nivelu a Consiliului şi a Parlamentului European, nai ma ayoniea tu 2014. Şeflu ali diplomaţii româneascâ hâbârisi că Bucureştiul caftâ s-andreagâ, cu agiutorlu ali Franţâ, unâ andamusi a minişţrâlor di Externi dit vâsâliili membri a Uniunâl’ei Europeanâ, tu ahurhita a anlui ţi va s-yinâ, Chişinău, cu furn’iea a andruparâl’ei a Republicâl’ei Moldova tu calea a ei câtâ Evropa. Tu vizita a lui, ministrul român di Externi s-adunâ şi cu prezidentul Nicolae Timofti. Doil’ii ofiţiali şi-aspusirâ nica unâ oarâ apruchiarea “frâţeascâ” a ligâturilor di dauli părţâ, întimil’iati pi Parteneriatlu strategic ti integrarea europeană a Moldovâl’ei.

Tu ţi mutreaşti dosarlu a reghiunâl’ei ayoriea, pro-arusâ, Transnistria, Titus Corlăţean adusi aminti iara di poziţia ali Românii, cari andrupaşti andridzearea aliştei problemâ, cu buna tin’iseari a suveranitatâ’ei şi a integritatâl’ei teritorialâ a Republicâl’ei Moldova, tu sinurli a ei internaţional pricânâscuti.