Romgaz – la bursâ
Protlu-ministru Victor Ponta dişc’isi, Marţâ, andamusea a Bursâl’ei di Londra, tu prota dzuâ di listari a soţietatâl’ei româneascâ Romgaz, catandisi tu cari dzâsi că, ti Românii, aestâ easti un chiro di turlii isturicâ, maxus că easti prota oarâ cându unâ companii di stat easti bâgatâ tu unâ ahtari operaţiuni internaţionalâ. Acţiun’ili Romgaz, nai ma marli producator şi furnizor di gazi dit Românii, furâ listati tu idyul chiro, şi Bucureşti, ama şi tu capitala britanicâ.
România Internațional, 13.11.2013, 11:02
Protlu-ministru Victor Ponta dişc’isi, Marţâ, andamusea a Bursâl’ei di Londra, tu prota dzuâ di listari a soţietatâl’ei româneascâ Romgaz, catandisi tu cari dzâsi că, ti Românii, aestâ easti un chiro di turlii isturicâ, maxus că easti prota oarâ cându unâ companii di stat easti bâgatâ tu unâ ahtari operaţiuni internaţionalâ. Acţiun’ili Romgaz, nai ma marli producator şi furnizor di gazi dit Românii, furâ listati tu idyul chiro, şi Bucureşti, ama şi tu capitala britanicâ.
Aestâ listari deadun bagâ România pi harta a investitorilor internaţionali şi agiutâ tranzacţiili a Bursâl’ei româneascâ. Responsabilu mutrinda marketinglu şi ligâturli internationali di la Bursa di Valori Bucuresti, Mariana Ciurel, dzâţea: “Prota dzuâ di tranzacţionari a acţiun’ilor Romgaz adusi la Bursâ un pâhă a tranzacţiilor di vârâ 110 di milioani di lei, di 2,7 ori ma mari andicra di media di cathi dzuâ a tranzacţiilor di estan”. Şi Xavier Rolet, CEO London Stock Exchange, s-aspusi tin’isit câ ţe instituţia pi cari u reprezintâ ţâni prota privatizari româneascâ prit listari internaţionalâ: ”România ari un loc ayoriea tu inima a noastrâ, câ ţe ligâtura ţi u avem noi cu Bursa di Valori easti bunâ, ama şi că avem andruparea di turlii tehnologicâ şi parteneriatlu di lucru deadun. Listarea la Bursâ yini cu perspectivi mări di împrustari.”
Pâhălu ali tranzacţii bagâ Romgaz multu pisti companiili comparabili dit Europa Centralâ şi di Estu. Tu idyul chiro, ea aratâ, tu minduita a specialişţâlor, ca unâ companii româneascâ di stat poati s-agiungâ la nai ma analtili standardi internationali şi că investitorl’ii xen’I vor s-intrâ tu icunumia româneascâ câ ţe industria ari un mari potenţial energhetic. Londra, premierlu Victor Ponta hâbârisi ca lucârli nu va s-dânâseascâ aoa. Victor Ponta: “Avanda ca timel’iu aestâ isturii di sucţes,am nâdia că la anlu va s-yinim aoa şi cu Hidroelectrica, Electrica şi alti companii publiţi româneşţâ. Mai am nâdia şi câ aestu lucru va s-da a investitorilor xen’i nai ma bunlu mesaj, aţel că România easti discl’isâ câtâ lumi şi că him ietimi s-nâ ufilisim puterea ţi nu u valorificăm pânâ tora.” Tu catandisi, Romgaz hâbârisi ca mutreaşti s-creascâ, s-extindâ tu anlu ţi va s-yinâ, cândâ va s-li’a parti la licitaţia ti concesionarea a nâscântor locuri di iu s-scot hidrocarburili.
