Andamusea ali diplomaţii româneascâ
România Internațional, 28.08.2013, 11:55
Criza dit Sirii şi vârâ intervenţii di turlii militarâ internaţionalâ tu aestâ vâsâlii fu protlu lucru ti zburari tu prota dzuâ di andamusi di cathi an ali diplomaţii româneascâ di Bucureşti. Caplu a statlui, Traian Basescu, dzâsi că România easti anamisa di tuţ aliaţâl’ii a ei maca ONU va s-aratâ că implicarea a reghimlui di Damasc, stâmâna ţi tricu, tu un atac cu armi di turlii chimicâ. Prezdentul spusi că România va şi-aspunâ poziţia dupu ţi va s-iasâ rezultatlu a misiunâl’ei di anchetâ a experţâlor ONU ţi suntu tora tu Sirii. Tut el dzâsi că prota îndrupaşti prudenţa tu catandisea sirianâ, maxus că tu aestâ vâsâlii bâneadzâ tora cama di 10 n’ii di cetăţen’i român’i. Tu adunarea di trei dzâli di Bucureşti, s-prezentarâ protli lucri ti mutreari ti diplomaţia româneascâ. Tu minduita a prezidentului Traian Băsescu, intrarea ali Românii la spaţiul di libirâ urdinari Schengen, ţi easti aştiptatâ nica dit Marţu 2011, ama amânatâ di baia ori, nica armâni prota pi lista a lucârilor ţi lipsescu adrari. Caplu ali vâsâlii adusi aminti că lipseaşti cama multâ mutreari, atenţii tu ligâturli cu statili dit Asia Centralâ, ama şi concentrari cama mari tu ţi mutreaşti parteneriatlu cu SUA. Traian Bâsescu: El ari tuti şansili s-împrusteadzâ ayoniea şi dupu operaţionalizarea dit anlu 2015 a scutlui di Deveşelu, ama şi dupu îndridzearea militarâ dit Asia Centralâ câtâ Europa şi nai ma multu câtâ Românii”. Caplu ali diplomaţii di Bucureşti, Titus Corlatean, ţânu s-aducâ aminti că easti di mari simasii duţearea ninti a politicâl’ei externâ româneascâ di consolidari, împrustari a profilului ali Românii tu cadrul a instituţiilor europeani şi euroatlantiţi, deadun cu unâ bunâ promovari a interesilor naţionali. El lâ deadi curagiu a ambasadorilor s-creascâ activitătli di promovari a interesilor a firmilor româneşţâ tu xeani şi s-lâ pitreacâ a investitorilor şi a partenerilor icunumiţ un zbor di pistusini tu icunumia ali Românii, cari, cu tut climatlu internaţional greu, armâni un loc bun ti investiţii . Premierlu Victor Ponta lâ câftă a diplomaţlor român’i s-asunâ pisti tut interesili leghitimi ali Românii tu xeani, s-hibâ multu activi tu ţi mutreaşti cooperarea icunumicâ, ama şi comercialâ. Tu el lâ dzâsi aluştor s-aspunâ realitatea dit vâsâlii, s-nu arâdâ, s-nu ascumdâ problemili, ama niţi s-aproachi prezentarea ali Româniii şi a român’ilor tu unâ turlii cari ti mass-media internaţionalâ poati s-hibâ interesantâ. Tu ţi mutreaşti comunităţli româneşţâ dit xeani, autoritaţli di Bucureşti aspusirâ că lipseaşti nica andrupari ti participarea aluştor tu proiectul “Maşi unâ Românii, ahurhit tu anlu ţi tricu, câ ţe aşi pot s-agiutâ multu la îndridzearea ali societati româneascâ
