Odiseea a cadurilor afurati
Niţi nu s-diş’clisi ghini, Marţâ, Bucureşti, că proceslu a român’ilor implicaţ tu afurarea a 7 caduri di la Galeria Kunsthal di Rotterdam fu amânat, ti furn’ii di turlii proceduralâ, ti 10 di Yismârciun. S-adusi câbati ti şasi oamin’i că luarâ parti icâ agiutarâ la aţea ţi-i dzâţi presa afurarea a secolului. Tu noaptea di 15 câtâ 16 di Brumar 2012, di la muzeulu olandez furâ luati picturi multu cânâscuti, adrati di maeşţrâ ca Picasso, Matisse, Monet şi Gaugain. Aesti dit soni furâ adusi tu Românii, iara a unâ parti dit eali îi si deadi foc, dupu cum dzâsi mama a protlui suspectu. Dapoaia, ea şi-trapsi nâpoi zboarâli. Ama prota variantâ pari s-hibâ, confirmatâ di expertiza ţi u adrarâ specialişţâl’ii di la Muzeulu Naţional di Isturii ali Românii, di iu s-vidzu că cinuşa analizatâ tu aestu caz, ţi u aflarâ tu casa a mul’iarâl’ei, inşi dit ardearea a trei icâ patru operi di artâ ayoriea, picturi adrati prit tehnica a untulemnului pi pândză.
Ştefan Stoica, 14.08.2013, 11:42
Tu idyul chiro, cuili ţi li aflarâ aduc niscânti indicii că easti zborlu di caduri cama vecl’i di inşita a secolului al XIX-lea. Ama directorlu a Muzeului cari mutri tuti probili dzâsi că nu poati s-aspunâ limpidi că cinuşa easti, dealihea, di la cadurli şi furâ furati şi că, tu ţi mutreaşti lucrărli adrati pi carti, pi hârtii, nu mai poati s-hibâ scoasâ tu migdani vârâ urmâ. Tutnâoarâ, avucaţl’ii aţilor a curi lâ si aduţ câbati, vidzurâ expertiza adratâ tu Românii şi aspusirâ că vor s-pitreacâ tuti probili la Luvru. Avucaţl’ii dzâc că clienţâl’ii a lor lâ aspusirâ că tuti cadurli luati di la Muzeulu dit Rotterdam nu furâ arsi şi că aşteaptâ ahurhearea a unui nău cadru procesual corectu ta s-li da nâpoi a autorităţlor olandezi. Tu minduita a avucatului a protlui suspectu, aestu dit soni taha pripusi unâ achicâseari” a anchetatorilor, icâ darea nâpoi a ţinţi dintrâ caduri maşi s-aibâ unâ pideapsâ tu Olanda, iu condamnarea ti afurarea di aestâ turlii, calificatâ, nu easti aşi lai ca tu Românii. Avucatul, ţi easti şi unâ vedetâ tu peisagilu giudiţiar autohton, nu amintă s-aratâ că autorlu a furtului ari dealihea, aţeali ţinţi caduri.
Şi aşi, nâdia că unâ parti dit ghinicânâscutili picturi furâ ascâpati di la ardeari, creaşti. Pi di altâ parti, tihea a dauâ dintrâ caduri armâni nicânâscutâ, iara anchetatorl’ii suntu aspâreaţ că eali furâ arsi. Afurarea a niscântor picturi ţi au un pâhă ţi treaţi di 18 di milioani di euro aduţi îndauâ antribări şi tu ţi mutreaşti turlia cum fu asiguripsitâ afirearea, protecţia a operilor di artâ la Galeria Kunsthal dit Rotterdam, antribări la care va s-agiutâ ancheta ahurhitâ di autorităţli olandezi, dupu cum dzâţea idyul avucat român. Uidisit cu zboarâli a lui, aţei a curi lâ si aduţi câbati mutrinda câlcarea a normilor di securitati va s-hibâ pidipsiţ ca autor’ii a furtului.
