Festivalu Anonimlu, la a X-a ediţii
România Internațional, 09.08.2013, 11:28
Festivalu Anonimlu, la a X-a ediţii
Festivalu International di filmu “Anonimlu” ţi easti tu câsâbălu Simtul Yiryi dit Delta a Dunâl’ei, pânâ pi 18 di Augustu, agiunsi la dzaţea ediţii. Sapti lungmetraji şi 40 di filmi şcurti s-alumtâ ti trofeulu ţi alavdâ nai ma buna producţii di cinema. Tu aesţâ nauâ an’i, festivalu s-hârsi di participarea a nâscântor oamin’i cânâscuţ, cum sunt regizorl’ii Peter Greenaway, Ken Loach, Nuri Bilge Ceylan, ama şi producători ţi luarâ Oscarlu. Regizorlu Istvan Szabo va s-hibâ aţel di tin’ii oaspi aliştei ediţii şi va s-l’ia trofeulu Anonimlu ti tutâ cariera lui. Publiclu va s-poatâ s-veadâ nica unâ oarâ, deadun cu regizorlu, filmi di mari simasii ţi li adră el, cum sunt “Mephisto” (premilu Oscar, 1982) icâ “Colonelu Redl” (premilu a juriului, Cannes, 1985). Aţel dit soni filmu a lui, “The Door”, cu Helen Mirren tu protlu rol, fu prezentat tu ahurhita a Festivalului “Anonimlu”- 2012. Organizatorl’ii îndreapsirâ, Viniri, la Gala di dişcl’ideari, un filmu ţi amintă s-hârseascâ publiclu di la Berlinala 2013, “The grandmaster” (“Marele maestru”), tu regia al Wong Kar-Wai, iara ti bitisitâ, debutlu tu lungmetraj a regizorului Valentin Hotea, filmlu “Roxanne”. Nâinti di dzaţea ediţii a festivalului, directorlu Miruna Berescu nâ dzâsi: “Lucârli nai ma aştiptati di noi şi di public – pistipsescu – suntu ligati di yinearea al Isvan Szabo. Ama aşteptu cu mari hari şi filmul dit ahurhita a festivalului, al Kar-Wai cari dişcl’isi şi festivalu di filmu di Berlin, di iarna şi tricu. Voi s-aduc aminti şi di un altu filmu şi noi lu aştiptăm, ţi iara va s-puteţ s-lu videţ maşi la festival: ”Behind the Candelabra”, tu regia al Steven Soderbergh.” Uniclu filmu românescu dit competiţia di lungmetraj a festivalului easti “Matei, fcior miner”, di Alexandra Gulea. Filmul aliştei regizoari va s-hibâ proiectat tu idyea dzuâ cu aţel a fendisui, regizorlu Stere Gulea – “Hiu unâ moaşi comunistă”, cu Luminiţa Gheorghiu şi Ana Ularu tu protili roluri. Daţea ediţii a Festivalului Internaţional di Filmu Independentu easti îndreaptâ di Fundaţia “Anonimlu”, cu andruparea a Centrului Naţional ali Cinematografii, ali Uniuni a Cineaştilor dit Românii, a Consiliului Giudeţean Tulcea, a Institutului Cultural Român şi a Televiziunâl’ei Români. Proiecţiili va s-hibâ şi nâuntru, tu sala, ama şi nafoarâ – iar intrarea easti fârâ pâradz. Ti fudzearea câtâ câsâbălu Simtul Yoryi, NAVROM agiutâ cu ma multi navi, cârăvi, ţi fug dit Tulcea şi Mahmudia.
