Ş-draclu fudze di armân
di Nicolae Batzaria
România Internațional, 07.03.2013, 10:29
di Nicolae Batzaria
Un-oară căndu armânlu
Ş-ara di cu dimneaţă,
Să-l’i-Creapă-Numa-l’i dzăţe:
“Fârtate cu mbăreaţă!”
“S-bănedz”, l’i-u toarnă omlu,
Şi zboară după zboară
Năş feaţiră suţată
Ş-giurat el’i doil’i loară.
Deadun s-lucreadză loclu
S-amparţă-apoi ca fraţ
Ţe s-easă cătră veară,
Cum fac doi buni urtaţ.
Tră ninte-lă lucrarea !
Ş-tot grân el’i siminară
Ş-ca s-nu aibă ancăceare
Cu cale năş aflară:
Armânlu la mpărţare,
S-l’ia parte ma puţănă
Pri supră iţi creaşte !
Alantă ţe s-armănă
Ş-cu toate arădzăţińile
Ea draclu la s-adună.
“Ai şedz cu sănătate”. – “Ia du-te oară bună!”
Fărtaţl’i si dispartu,
Ş-da măna,s-başe-n gură,
Fac zbor s-adună veara,
Cum lă-easte-n ligătură.
Şi s-duţe cate-ş unlu
La lucrulu ţi ş-are.
Si-l’i-Ceapă-Numa s-bagă
Angrăńe şi ncăceare.
Arăde,-i maş harauă,
Arsare pri-un cicior.
“Dip ghine ńearse dzua
Lu arăş ahănt lişor!”
“Bre, glari ţe-ş fură armâńil’i.
Pân tora nu am vidzută
Un om cu ahtare minte
S-arădă tu minută.
S-l’ia partea di pisupră!
Aproape dip ţiva
Ş-alanta cama multa
A ńia maş să-ńi da.
Ma veara căndu vine,
Vidzu si-l’i-Creapă-Numa
C-armânlu nu s-ăncalţă,
Că un ăl feaţe muma.
Ia-l omlu cu nă coasă
Tot schicurle ş-l’i tal’e,
Ş-armase maş tră draclu
S-adună nişte pal’e.
“Fărtate”, dzăţe-atumţea, “Băgaş-me ved, tu sac,
Ti spuseş ma dişteptu
Di draclu cama drac.
Nu ńeardze, a, s-mi l’erţi,
Tră anlu care vine,
L’iau partea di pisupră
Ş-alantă s-u l’iai tine”.
“Pri chefea ta la s-facă, A s-hibă, bre fărtate,
Tră anlu di diveară,
Ai seamină patate”.
Ia-u ş-toamna ţea cu ploile
Lă faţe ea hăbare,
Că s-coapsiră patăţle,
Că-i oara tr-adunare.
“Ved tora”, dzăţe draclu, “Armânlu ţe s-adară
Nu poate ca s-me-arădă,
Ăńi vini ş-a mea oară”.
Ş-ma tal’e Sătănălu,
Asudă ş-tot ma s-curmă,
Ma frăndză ş-iara frăndză,
Pătate niţi urmă.
Armănlu l’ia nă sapă
Ş-te s-vedz la rădăţine!
Că deade Dumnidzălu
Ş-ambărle s-hibă mpline.
Cănd veade aşiţe draclu,
Fudzi năirit ca foc:
“Cu-armânlu nu s-acaţă,
Că-i şapte draţ tr-un loc”.
