Brașovlu turisticu
Brașovlu fu tru Eta di Mesi ună importantă ţitati, a deapoa, un căsăbă cari u ligă zona a Balcanilor di lumea ditu ascăpitată, un importantu ţentru comercial. Monumentili istoriţi, cari pot s’hibă mutriti și adză, măyipsescu turiștilli, stânda mărturie a niscăntului kiro ţi bubukiseaşti. Nai ma reprezentativu monumentu a căsăbălui armâni Băsearica Lae, nai ma mari construcție tru stilu goticu ditu România, cari easti nicukira și nai ma mari orgă ditu Europa. Vizităm adză căsăbălu Brașov și locurli di anvărliga deadunu cu Adrian Veștea, prezidentulu a Consiliului Giudețeanu.
Daniel Onea, 10.11.2021, 09:19
“Giudețlu Brașov s’hărseaşti cu multi monumente istoriţi. Ună parte ditu eale suntu arădăpsiti tamamu tru municipiulu Brașov. Putem s’ahurhimu cu Băsearica Lae, unu obiectiv căftatu di tuț turiștilli cari agiungu la noi. Tutunăoară, ună altă urminipseari va s’hibă prima școală românească. Ari un muzeu a aistei protă sculie, ndreaptă tru Băserica Sf. Nicolae. Urminipsimu și atealilalte muzee pi cari noi, Consiliul Giudețean, li ndrupămu pi hiotea a kirolui, tră multi expoziții. Putem s’ahurhimu cu Casa a Sfatului, administrată di Muzeulu Giudițean di Istorie, deapoa ma largu cu Casa Mureșenilor, un altu reperu istoric a giudețului Brașov. Tutunăoară, Muzeul di Artă, Muzeul di Etnografie suntu obiectivi multu apreciate di turiștilli a Brașovului.”
Brașovul easti un giudețu tru cari s’practică turismulu tru tuti ateali patru anotimpuri. Nu easti ună destinație di sezonu, spuni Adrian Veștea, prezidentulu a Consiliului Giudețean. “Poiana Brașov işi tru videală ca unu giuvaerico a stațiunilor turistiţi ditu România, hiinda una ditu ateali nai ma muşeati stațiuni montane a noastre. Aclo easti şi nai ma mari domeniu schiabilu ditu România. Tutunăoară, și tru kirolu di veară, stațiunea Poiana Brașov yine dinintea a multor turiști cu diversi oferti di discurmari a kirolui adyi, cu un cadru natural ahoryea. Tutunăoară, potu s’facă priimnari și pi muntili Tâmpa ditu muniţipiul Brașov. Ditu Poiana Brașov poati s’acaţă calea veaclle, pi la Cheţarli alu Solomon. Suntu trasee multu ghini ndreapti, cari pot s’hibă ună gaereti tră mulță turiști. Avem obiective și tru zona metropolitană. Ti exemplu, stațiunea turistică di interes național Râșnov easti a treia stațiune tru toplu a stațiunilor di interes naționalu, după Poiana Brașov și Predealu. Ari ună avută agendă culturală și muşuteţ turistiţi ahoryea. Voi să spunu ti Ţitatia Râșnov, tru znueari tora, la Dino Park, la spileaua Valea Titatillei, la complexulu olimpic di sporturi di iarnă, iu s-disvărti Festivalul Olimpic al Tineretlui European, ama și multi etape di Cupă Mondială.”
Partea rurală a giudețlui Brașov, pi ningă peisaje impresionante, easti mplină și ea tru obiective turistiţi. Adrian Veştea. “Hoara Bran easti și ea ună stațiune turistică di interesu național. Aclo va s’aflaţ cunuscutlu castel a contelui Dracula, Castelu Bran, cari nregistreadză anual cama di ună miliuni di turiști. Tutunăoară, zona Bran, Moeciu, Fundata suntu zone cu un turismu permanentu, bazat maxusu pi tradițiile și pe măyirgiria locală. Nica facu urminie ti stațiunea Predeal tru iţi perioadă a anlui, ţitățile fortificate ditu zona metropolitană. Avem, ase, ţităţli di la Prejmer, Hărman, Ghimbav. Ama și tru regiunea ditun Țara a Făgărașului suntu multe oferti. Spunu ti Ţitatea Făgăraș, ama și ti alanti muşuteţ: Mănăstirlu Brâncoveanu, di la Sâmbăta di Sus, Ţitatea di la Rupea, cari easti znuită tru aist kiro. Multu di simasie easti şi atea că avem și patrimoniu UNESCO. Easti zborlu ti hoara Viscri, cari easti multu ghini scoasă tru migdani și multu ghini conservat și, tutunăoară, di comuna Prejmer.”
Arămânem tru universulu a hoarăllei, aclo iu obiectele di artizanat a masturloru populari măyipsiră daima călătorlu interesat di tradițiile a loclui. Adrian Veştea, prezidentulu a Consiliului Giudețean. “Ti amărtie, tută aestă perioadă di pandemie numata deadi izini ti organizarea a niscăntoru evenimente culturale di anvergură, cari s’valorifică ahtări silăstăseri. Suntu mulță masturi populari cari, pi hiotea a kirolui, fură spuşi ca ună yişteari uminească yie UNESCO. A loru lă si durusi aestă nşani după cilăstăserli niacumtinati ditu diverse dumenii di lucru, pritu turlia tru cari u dusiră ma largu tradiția ta s’adară strañilu popular, ti cuseari, ti brodari, ama și tru alte domenii cum prilucrarea a lemnului, olărit. Tru perioada tru cari earamu primar, ndreapsimu ahtări evenimente și tru Ţitatia Râșnov.”
Iarna, armâni, ama, perioada ditu an cu ateali ma multi rezervări. Ică vreţ s’triţeţ sărbătorli tru un cadru di pirmithu, I vreţ s’practicaț sporturi di iarnă și s’participaț la vecllili tradiții di pritu hori, giudețlu Brașov armâni destinația ideală tră tută familia. Adrian Veștea, prezidentulu a Consiliului Județean.
“Nă caftă cabaia multu tu perioada di iarnă. Emu tru Țara Făgărașului, Rupea și maxusu tru zona metropolitană, tru Țara Bârsăllei, suntu multi multi pachete atractivi, ndreapti ti sărbătorli di iarnă. Suntu multi tradiții ţi potu ss’li veadă tru aestă perioadă aţelli ţi yinu tru giudețlu Brașov. Di altă parti, oferta turistică s’bitiseaşti ditu ahurhita-a meslui andreu. Giudețlu Brașov avu ună creastiri spectaculoasă a numirlui di turiști di la an la an. Avem cama di ună miliuni și giumitati di turiști cari agiung cathi anu tru giudețul a nostru. Avem multi obiective turistiţi, easti giudețlu a tutăloru anotimpurilor și vă aștiptăm s’triteţ unu muşeatu kiro aoa la noi.”
Călisearea fu faptă. Până data yinitoari, cându vă aștiptăm cu ună nauă destinație, căftat-lu tamamu tora agentul di turismu tră s’vă rezervaţ aţeali ma buni oferti di vacanță tru giudețlu Brașov.
Autoru: Daniel Onea
Armânipsearia: Taşcu Lala
