Regizorlu armânu Toma Enache, fu durusitu cu „Premio Cultura”
Toma Enache, regizorlu a filmului „Enescu, jupuit di viu” (Enescu, bilitu di yiu), fu durusitu cu „Premio Cultura”.
Tașcu Lala, 03.09.2024, 07:17
Toma Enache, regizorlu a filmului „Enescu, jupuit di viu” (Enescu, bilitu di yiu), fu tiñisitu, aoa ș-pțânu kiro cu „Premio Cultura” tu arada a unlui evenimentu culturalu andreptu Veneția. Filmlu va s-iasâ tu padi tu Românie tu meslu brumaru 2024 ș-va s-facâ cama di 30 di premieri di galâ tu câsâbadz ditu tutâ vâsilia.
Regizorlu fu la evenimentul cultural „Leoni, Gattopardi di Sicilia” andreptu la Palazzo Donà dalle Rose. Aestu proiectu fu adratu ș-regizat di Nino Graziano Lucadeadunu cu Contesa Chiara Modica Donà dalle Rose, cu andrupare ali Comisie di Cultură ali Camerâ a Deputațlor ditu Italie ș-a Consiliului Internațional a Dansului UNESCO.
„Mi hârsescu s-aprokiu Premiul Cultura, unu premiu ți s-da tu unu locu emblematicu – Veneția. Aestâ pricunușteari u ampartu cu maestrul Stefano Nicolao, ațelu ți adră tâcâñli/armatili ditu filmul a nostu. Âlli hâristusescu ali doamnâ Gabriela Dancău, ambasadoarea ali Românie tu Italie, a Prezidentului ali Comisie di Culturâ ditu Camera a Deputațlor a Parlamentului italian, On. Federico Mollicone, ș-organizatorlui a evenimentului, Nino Graziano Luca, deadunu cu familia Donà dalle Rose”, dzâsi regizorlu Toma Enache. Anda âlli si deadi premiulu el fu deadunu cu doilli producători executivi a filmului, Marta Maria Mocanu ș-Elena Enache.
Publiclu românescu va s-aibâ arastea s-veadâ ti prota oarâ aestu filmu ahurhindalui cu melsu brumaru. „Enescu, jupuit di viu” (Enescu, bilitu di yiu) va s-hibâ scosu tu padi tu arada a cama di 30 di proiecții di galâ tru tutâ vâsilia, ahurhindalui cu 2 di brumaru Iași, dapoaia tu 4 di brumaru București, 5 di brumaru Ploieşti și 6 di brumaru Custanţa.
Regizorlu Toma Enache dzâsi: „Aestu filmu ari tu naeti sâ scoatâ tu migdani emu genialitatea a compozitorlui George Enescu, emu partea umineascâ a lui. Amu umutea că pritu aestâ producție va s-aduțemu ma aproapea publiclu di geanlu alu Enescu și s-lu adrămu s-hibâ vrutu ași cumu lipseaști. Pi ninga compozitorlu di geniu, easti omlu Enescu, ți publiclu poati s-lu veadâ tu aestu filmu. Amu nâdia că filmul a nost va-lli imiripseascâ niscânțâ oamiñi, lucru ți Enescu vrea s-lu adarâ pritu muzica a lui. Vahi nu mași sâ-lli imiripseascâ, ama sâ-lli adarâ s-lu va ași cumu lipseaști.”
Filmul s-hârseaști di unâ distribuție ti anami, cu Mircea Dragoman tu rollu al George Enescu ș-Theodora Sandu tu rollu ali Prințesâ Maruca, deadunu cu alțâ actori cunuscuț, cata cumu Cezara Dafinescu, Manuela Hărăbor, Adrian Titieni, Cristian Sofron, Kira Hagi (feata a cunuscutlui agiucâtoru armânu di fotbalu, Gică Hagi), Pavel Ulici, Filip Ristovski, Erica Moldovan, Codrin Dănilă și Constantin Codrescu.
Tâcâñili suntu adrati di italianlu Stefano Nicolao, iara muzica adunâ operi de-al George Enescu și compoziții orighinali imnati di Sebastian Androne-Nakanishi, ațelu ți amintă „Composer Award” la International Classical Music Awards tu 2022.
Muzica ditu filmu easti cântatâ di Orchestra Națională ali Franțâ/Galie, cumândârsitâ di Maestrulu Cristian Măcelaru, directoru artisticu a Festivalului George Enescu, ș-di Orchestra Naționalâ Radio ditu Românie, cumândârsitâ di Maestrul Horia Andreescu. Tutnâoarâ, violonistul Alexandru Tomescu adavgâ unâ notâ ahoryea aliștei producții sonori. Ari ș-unu fragmentu muzical orighinal, cântatu di George Enescu la avyiulie ș-Dinu Lipatti la pian.
Autor: Eugen Cojocariu
Armănipsearea: Mirela Sima-Biolan
