Bianca Boeroiu, premiatâ cu Emmy
Bianca Boeroiu, unâ ditu cama cânâscutili artisti români di make-up, amintă Premiul Emmy 2023 ti nai ma bunlu machiaj contemporanu.
Tașcu Lala, 11.12.2024, 19:17
Multu cânâscutlu premiu âlli fu ahârdzitu ti machiajlu adratu ti seriallu Wednesday, regizatu di Tim Burton, adratu di Netflix ș-filmat tu Românie deadunu cu ma mulțâ artișțâ ș-tehnițieñi româñi. Artista ș-bâgă simnâtura pi multi reclami și videoclipuri, ș-agiumsi s-lucreadzâ cu actori cu anami: Samuel L. Jackson, Michael Keaton i John Malkovich.
Tu Românie ari chiola tu palmares 3 ayalmi GOPO și 9 nominalizări ti filmi cata cumu suntu: „Eu când vreau sâ fluier, fluier” (“Mini, cându voi s-așuiru, așuiru” ),„Loverboy”, „Un pas în urma serafimilor” (Unâ jgllioatâ dupâ serafiñi ), „Funeralii fericite” (“Angrupari cu harauâ”), „Aferim”, „Câmp di maci” (“Câmpu cu pirpirunâ”) și „Nu aștepta prea mult de la sfârșitul lumii” (“Nu așteaptâ para multu di la bitisita a lumillei”). Bianca Boeroiu nâ zburâ ti cumu agiumsi s-minteascâ tu adrarea a seriallui Wednesday ș-cumu s-documentă ti adrarea a make-up-ului:
”Lucurlu cu Tim Burton vini dupâ unu interviu ți lu avui cu designerlu aluștui proiectu. Ași agiumșu s-lucredzu tu echipa cari adră make-up-lu a actorilor, deadunu cu colegañi ditu Anglie ș-di colegañi ditu Românie. Adrai make up-lu ti multi personaji, cama mulțâlli ditu colegañilli alu Wednesday, ma multu ațelli ditu Nevermore Academy.
Tut mini adrai ș-make-up-lu ti primarlu a câsâbălui ș-ațelu a unui personaj di mari simasie, Eugene, unlu di nai ma ciudioșlli studențâ ali Academie Nevermore și prezidentul a clublui di apiculturâ ali sculie. Dealihea, aproapea tuti personajili ditu aestu serialu furâ machiati di mini, nafoarâ, siyura, di actorilli para cânâscuț di cari avu angâtanu designer-lu aluștui proiectu ș-di protagonista a seriallui, Jenna Ortega, ți avu personal make-up.
Ligatu di partea di documentari a unui proiectu di ahtari turlie, regizorlu avu chiola unâ viziuni ti personaji. Siyura, avemu dyivâsitâ ș-noi sțenariul, avumu ședinți di producție, dapoaia testi. Maca easti zborlu di unâ producție di zâmani, easti unâ provocari ma multu ti noi, ama ș-ti unu filmu contemporanu make-up-lu angreacâ multu. Ti seriallu Wednesday, personajili eara ghini minduiti di designer-lu a seriallui ș-di regizorlu Tim Burton, ama avumu ș-noi partea a noastâ di contribuție.”
Tu ahurhita a anlui, Bianca Boeroiu lo parti la țeremonia di ahârdziri a premiilor Emmy: ”Putui s-agiungu aclo ș-mi hârsescu para multu că adrai aestu lucru. Fu unâ experiențâ ti mirachi, amu umutea că va negu ș-altâ oarâ la ahtări evenimenti. Bircheavisu aluștui premiu agiumșu ti prota oarâ tu Statili Uniti ali Americâ, la Los Angeles, ș-âñi pâru ti anami. Șidzui aproapea unâ stâmânâ ș-mi adunai cu soț ș-colegañi spețialișțâ tu make-up, cu cari amu lucratâ deadunu la alti proiecti tu Românie.
Fu unâ experiențâ intensâ ș-emoționantâ, nu-ari s-agârșescu putes oara cându dzâsirâ numa a filmului “Wednesday” pi sțenâ. Rezultatlu nu sâ știe di ninti, easti ca la Premiile Gopo, atumțea cându s-dișcllidi pliclu anveț maca amintași, ma nu. Iara aestu premiu, dealihea, țâ creaști cota. Mini amu lucratâ ș-ma ninti tu producții internaționali, cama multili ivropeani, avui ș-unâ colaborari Disney ș-hiu multu dișcllisâ la ahtări pripuniri.”
Profesoarâ di arta a ceramicâlli, Bianca Boeroiu lucreadzâ di cama di 20 añi la Pâlatea Naționalâ a Ficiurițloru di București, iara tora lucreadzâ la unu suportu di cursu ti aesti sâhăț/ceasuri di ceramicâ:
”Bitisii Universitatea Naționalâ di Arti di București, secția Ceramicâ – Arti decorativi și, unâ ș-unâ ți bitisii facultatea, intrai tu anvițâmintu, iara aestâ thesi di profesoarâ ți u loai la Pâlatea Naționalâ a Ficiurițloru u voi multu, nu potu s-tragu mânâ di ea canâoarâ, câtu multi oferti s-amu ca artistu make-up. Easti unâ zonâ iu mi duchescu multu ghini, ficiurițlli dealihea țâ da unâ energhie ti anami ș-multi satisfacții.
Di make-up fui miracllioañi nica di featâ ñicâ, iara unâ soațâ ñi deadi urnimi aesta, s-adaru unu cursu tu aestâ direcție. Tu ahurhitâ nu para vreamu, frândzeamu coasti, pricânoscu, niți nu șteam că ari ahtari secție la Universitatea di Arti iu poț s-anveț aestâ spețializari. Dupâ ți anvițai di ea, lucrâli curarâ, canda, dimi adrai tutu cu multâ mirachi ș-hâști ș-ași s-ligarâ lucrâli. Di atumțea fui aproapea dipriunâ pi lucru tu proiecti di ahtari turlie, tu ahurhitâ nai ma multili eara româneșțâ, a dapoaia ahurhirâ s-alânceascâ ș-colaborâri internaționali.”
Bianca Boeroiu easti ș-membrâ ali Uniuni a Artișțâloru Plastiț ditu Românie, lucrărli a llei loarâ Premiu ti anchisita tu ceramicâ la Bienala Artili a foclui.
Autor: Corina Sabău
Apriduțearea: Mirela Biolan
