Aprindu Pashti di Ion Foti
Ți zbor dulți-i Paștili. Țâ si umpli budza di ñiari cându-l dzâț. Câtâ harauâ, câtâ mușuteațâ n-aduți cu nâs!
Tașcu Lala, 25.04.2025, 16:12
Soarli ațelu mușatlu a primuvearâllei ș-arcă zâvonlu-lli di hrisafi pisti tut loclu. Ș-munțâlli, arâurli, loclu ântreg s-anveaști ca di nveastâ, ncârcatâ di virdeațâ, di lilici ș-di asimea anyilicioasâ a apilor zdruditi ți dipun dit piștirei.
Ți zbor dulți-i Paștili. Țâ si umpli budza di ñiari cându-l dzâț. Câtâ harauâ, câtâ mușuteațâ n-aduți cu nâs!
Niorlli grei a iarnâllei s-arâspândirâ câtrâ tu chiritâ. Neaua cari anvâlea livădzli ș-pâdurea s-tuchi ca un yis urut.
Ia-li ș-alândurli hârcoapi ca feati ñiț si-ncaci unâ cu alantâ. Alti ș-aspun câñina, alti s-bași ș-ñiclul a lor cheptu-i amplin di banâ, harauâ ș-di vreari.
Di diparti s-avdu chipurli di oi. S-avdu boțli di cloputi a mânarilor. S-avdu câñilli cari alatrâ că-și vidzurâ scumpul a lor loc ș-picurarilli șuirâ.
Vălliurili s-trunduescu, munțâlli arâd, niazvimțâlli calancadz a loclui ș-tuti lucrili di sti loc s-hârsescu. Lâ si umpli inima di dor că s-vidzurâ tuti unâ ninga alantâ: picurarlu ninga munti ș-muntili ninga picurar, soț nidispârțâț di eti.
Ma ți-i vreava aesta tu tuti părțâli? Mullerli frimitâ, ungu casili, ândreg gârdina și scuturâ strañili nali ș-nipurtati tutâ iarna, ancllisi tu sfinduchi, că yini Paștili – mușata Sârbâtoari a Primuvearâllei.
Dzuua di Paști, Hristolu s-dipuni sti loc.
Dzuua di Paști, Dumnidzălu âlli vluyiseaști pi tuț: pri buñi ș-pri arău, pri oarfâñi ș-pri avuț. Că Paștili-i dzuua cându s-llia mbrațâ țerlu ș-loclu.
Ș-oamiñilli, agârșindalui lâiețli a lor, s-alinâ-n sus, n sus câtrâ Ațelu cari nâ deadi luñinâ ș-nâ feați domñi a loclui.
Lumbărdzâli ardu tu tuti bâserițli. Criștiñilli, cu gurguili di țearâ, ies nintea a țerlui ș-prefțâlli, cu strañili hrisusiti, cu caplu gol, spun a lumillei dit unâ mardzinâ tu alanta a loclui că Hristolu Anyie.
Ș-atumțea țerlu s-dișcllidi tu mesea a noaptillei, anyili gioacâ ș-oamiñilli ñiraț di ahântâ mâreațâ ș-pleacâ dzânuncllilli ș-cu boați șuptiratâ spun marea ciudie al Dumnidză: HRISTOLU ANYIE!
