Marli actoru Ion Caramitru dusi la Aţelu di Analtu
Tașcu Lala, 06.09.2021, 21:15
Actorlu Ion Caramitru dusi la Aţelu di Analtu tu ilikia di 79 di añi dumănică, la Spitalu Elias, di București. Ion Caramitru avea 79 di añi și cumăndusea Teatrulu Național di București.
Ivan Patzaichin şi Ion Caramitru, cari muriră dumănică, anyiliciră arenili sportivi şi sţenili pi cari alinară, spusi prezidentulu Klaus Iohannis. Astăndză easti ună dzuuă anfărmăcoasă ti văsilia a noastră. Nă dispărţămu cu aeşţa doi ditu nai cama vruţlli români. Ivan Patzaichin şi Ion Caramitru anyiliciră arenili sportivi şi sţenili pi cari alinară. Azvingători şi yilipsitori tru sportu şi teatru, Ivan Patzaichin şi Ion Caramitru, pritu kirearea a loru pi napandica, nă alasă adză ma oarfăñi, ama haristusiţ maş cu aduţearea aminti a giunamillei ţi u deadiră ti România pritu energhia, harea, vrearea şi gaereţli a loru ta s’hibă nai ma buñlli. Puryurii ti familiili a lor şi a aţiloru vruţ tră taxiratea pritu cari trecu, angrăpsi şeflu a statlui pi Facebook.
“Easti ună dzuuă di jeali ti România. Cara tahina kirumu un mari român ditu lumea-a sportului, ia că ti prăndzu nă vini ună hăbari cari alăxeaşti pănu di mardzină bana culturală. Acă eara pi ilikia ţi u avea, Ion Caramitru nica eara un motor ti atea ţi nsimna evenimentili teatrali”, spusi și Bogdan Gheorghiu, ministurlu a Culturăllei.
Ion Caramitru s-amintă tu ună familie de armâñi.
Caramitru bitisi Institutlu di Artă Teatrală și Cinematografică I.L. Caragiale clasa profesor Beate Fredanov, tru 1964, debutândalui cu un an ma ayoñea la Teatrul Bulandra – cu rolu prinţipalu tru Hamlet di William Shakespeare. Ș-dusi ma largu angajamentul la teatrul Bulandra un kiro, iu giucă și tru spectacoli la Teatrul Național București și tru alti lenu turlii di teatri.
Avu dzăţ di roluri pi sţenili românești și a lumillei, dzăţ di roluri tru filmi, suti di roluri la teatru radiofonic, regizor, profesor di teatru, ministru a culturăllei, prezidentulu UNITER – Ion Caramitru, ună bană ahărdzită tră teatru.
Ion Caramitru fu ministru a Culturăllei anamisa di añilli 1996 și 2000. Fu aleptu prezidentu UNITER di la thimilliusearea aliştei, tu 15 di şcurtu 1990.
Tru 2017, fu tiñisitu cu Titlul de cetăţean di tiñie ali Capitală, cum şi cu titlulu di ambasador Shakespeare tru România, ahărdzitu di Consiliulu Britanic, cu furñia a Anlui Shakespeare 400. Tut tru anlu 2017, prezidentulu Klaus Iohannis ălu tiñisi Ion Caramitru cu Ordinlu Naţionalu Steaua a Româniillei tru gradu di Cavaler, cu furñia că agiumsi pi ilikia di 75 d añi.
Tru dzălili di 21-22 di andreu 1989, s-arădăpsi anamisa di conducătorlli a manifestaţiilor anticomunisti di Bucureşti. La 22 di andreu 1989, tru frămtea a unallei parei di manifestanţă intră tu casa a Televiziunillei Români, hiinda protlu cari hăbărisi pi postul naţionalu di televiziuni curmarea-a dictaturăllei.
Autoru: Udălu a hăbărloru
Armânipsearea: Taşcu Lala
