“ELÂ și Colindi” di Vanghea Mihanj-Steryu
S-apruchea Anlu Nău...
Tașcu Lala, 29.12.2024, 08:25
“ELÂ și Colindi” di Vanghea Mihanj-Steryu
S-apruchea Anlu Nău…
Jeleniţa şi Tamara cu pârinţâl’i-a lor ti Anlu Nău s-andridzea, Elâ cu năi fustân’i şi-ancupră. Ela ca Elâ, aştipta ti Anlu Nău tu năi stran’i s-u alâxseascâ şi casa a lor s-u anghiliciascâ.
Aşi Jeleniţa cu sora Tamara lâ grirâ-a soaţâlor: Vania, Luna, Ţeţe, Ivan, Cristian, Bani, Alexandru un şi doi, Sonia, Tania, Maniea şi alţâ şi Ela tu fustani di sirmâ veardi u alâxirâ.
Faţâ l’i-u aruşirâ, pi budzâ aruşaţâ îl’i bâgarâ şi ochil’i l’i şminchirâ. Pâpuţâ di malâmâ l’i bâgarâ, cârun’i di sârmâ pisti pâltări l’i arcarâ, n-cap steauâ l’i bâgarâ, ghiurdăn’i di mârdzeali cu steali pi guşi l’i ardâpsirâ, chipurici îl’i ligarâ, silivari di malâmâ l’i aspindzurarâ, biliciţ cu neali pi mân’i l’i ardâpsirâ, minghiuşi di urecl’i l’i aspindzurarâ cu albi peani u pispilipsirâ şi Anlu Nău proţ ş-lu urarâ.
Cându u armutusirâ şi ca nauâ nveastâ u adrarâ, acâţarâ şi un cântic l’i scriarâ ş-tuţ deadun u anvârligarâ, cântarâ, giucarâ, ş-la tuţ ficiuriţ u hâbârisirâ.
Dupu aţea – a Paplui Gl’eţ l’i grirâ, Anlu Nău ş-lu aştiptarâ ş-urarâ, mân’li al Papu Gl’eţu-l’i bâşearâ, tuţ s-adunarâ, s-ancl’inarâ ş-tu leagânlu-a vimtului durn’irâ.
Paplu Gl’eţu leagânlu lu ligână, a tutulor ficiuriţ lâ si ancl’inâ, tu frâmti l’i bâşe, arâsi, a somnului “Adio” l’i dzâsi şi tu soni cu cârtusea şi dol’i irisi, pi-a lui lungâ cali anchisi ş-alţâ ficiuriţ n-lumi hârsi.
Alantâ dzuâ yislu a ficiuriţlor bitisi.
Anlu Nâu cu nâu cântic lucurlu ş-lu ahurhi.
ELÂ
Elâ, Elâ di Nău An
Ca tini noari can,
Cu gigi-migi chindisitâ
Cu mârdzeali zugrâpsitâ,
Scântil’edz, lun’inedz,
La tuţ pi masâ şedz.
Noi!
Noi pul’i hârsitorr!
Ficiuriţ milion’i…
Cântic ţâ cântâm
Cu tini, Elâ!
Nâulu An vini.
Cu tini Elâ!
Ş-Paplu Gl’eţ hârios yini.
Ascultaţ aoa pirmithlu Elâ dghivâsitu di Cristina Mina–>
