Vizitaț România – Bâsearica fortificată Hărman
Agiundzemu ază Hărman ică Huntschprich tru dialectul săsescu, tru apriduţeari Muntili a Nearillei. Easti ună nică hoară nica și isihă, tru ţentrul ali Românie, la aproapea dzaţi km di Brașov. Unu di muzeele discllise după scutearea-a catandisillei di an
Daniel Onea, 25.05.2020, 18:31
Agiundzemu ază Hărman ică Huntschprich tru dialectul săsescu, tru apriduţeari Muntili a N’earillei. Easti ună n’ică hoară nica și isihă, tru ţentrul ali Românie, la aproapea dzaţi km di Brașov. Unu di muzeele discllise după scutearea-a catandisillei di ananghi tru contextul a pandemiillei COVID-19 fu aţelu a ţitatillei Hărman, monumentu importantu ali Transilvanie. Easti unâ bâsearică evanghelică fortificată, unâ cadealihea țitati, multu ghini conservată, anâlţatâ tru secolul al XII-lea. Tru secolul XV-ţi comunitatea mindui ta s-alâxeascâ stilu a bâsericâllei evanghelicâ ditu stilu romanic tru stilu gotic, ama lucrărli s-dânâsirâ la supraetajarea a pirgului-clopotniță, cari, avânda 32 di meatri, agiundzea s’hibâ nai cama analtu ditu Țara Bârsâllei.
Ghidlu a nostru di azâ easti Dan Ilică-Popescu, custodili a ţitatillei cari spusi: Cându ti aproki di țitati, vedz di alargu pirgul a bâsericâllei. Easti multu important, di itia că ari nica patru pirguri n’iţ anvârliga di aţelu ma mari. Easti ţiva multu aretcu ţi s’veadi la bâseriţli di pritu hori, câţe aestâ spuni ndreptul tra s-pidipseascâ cu moartea tru localitatea respectivă. Easti un lucru aretcu andâmusitu tru localitățile n’iţ. Cu cât ti aproki ma multu di țitati, vedz mări mururi și avlakea di apă, cari, tu ahurhitâ, anvârliga acutotalui țitatea. Eara unâ turlie di apărari tru Eta dei Mesi. Intrarea s-fâţea prit un tunelu adratu după anlu 1800. Tru ahurhitâ, pisti avlakea a ţitatillei, tru loclu a tunelui, eara una apunti cari putea s’hibâ anâlţatâ. Intrarea s-fâţea pritu prota poartă di cupaciu, cari nica s-veadi şi azâ sânâtoasâ. Avea nica alti trei porțâ.”
Huryeaţlli nu avea pregătiri militară și bâga besâ ma multu pi construcția a ţitatillei, exighiseaşti Dan Ilică-Popescu, custodile a ţitatillei Hărman: Avea patru porțâ până la intrarea tru avlie. Ditu avlie, s-veadi bâserica babageanâ, cu căsiki ti bânâtorlli ditu comunitati, ţiva fârâ preaclle tru Țara-a Bârsâllei. Aesti furâ construite ningâ bâsearică. Ti amârtie, armasirâ maşi câsikili ditu notu. Tru aestu kiro, agiumsirâ muzee: un muzeu cu unâ parti ditu portul săsesc și unâ școală veaclle tru cari, ţi atelli ţi zburăscu limba germană, easti interesantu s-avdâ si tu aestu kiro dialectul cari sâ zburaşti aoa. Noi spunemu ghidaju a vizitatorlor tru limbile română, germană ică engleză. Avem și un ghid informativ cu zuyrâpsearea-a Titatillei și a lucârlor ditu muzee tru ma multi limbi: română, germană, italiană, spaniolă, franceză, ebraică. Avem tru pregătiri versiunile tru poloneză și rusă. Minduim s-anvâlimu cât s-poati di multu.”
Nviţămu di la Dan Ilică-Popescu, custodile a ţitatillei Hărman, că a turiștilor lâ si păru multu interesantă capela cu pictura ditu secolul al XV-lea, tru hromi nica ghini ţânuti. Ama un elementu idyealui di interesantu easti orologilu cu un singur arătător, cari spuni oarili și cari dateadză ditu secolu al XVI-lea. Nu dip tru soni, orga avu totna succes. Easti tru stil baroc, ari 19 di registre și datează ditu secolu al XVIII-lea. Toradioarâ, evenimentili cu public nu au izini sâ s-tânâ, ama atumtea cându va nâ turnămu la catandisea di ma ninti, ti bunu va s’hibâ s-loaţ parti la un conţertu, di itia câ acustica di Hărman easti ahoryea.
Ngrâpsearea: Daniel Onea
Armânipsearea: Taşcu Lala
