Vizita-a prezidentlui ali Românie tru Brazilia
Aflat voltă tru America Latină, prezidentulu român Klaus Iohannis spusi, tru muabeţli ţi li avu cu omologlu a lui brazilian, Lula da Silva, ti evoluţiile regionale şi globale.
Mihai Pelin, 19.04.2023, 20:19
Aflat voltă tru America di Sud, prezidentulu român, Klaus Iohannis, fu aştiptat, luni, di omologlu a lui brazilian, Luiz Inácio Lula da Silva. Vizita tru Brazilia, protlu partener comercial ali Românie tru America Latină, easti prima la nivel di şef di stat tru aeştă 23 di ani ditu soni.
Șeflu a statlui român ălli părăstisi a omologlui a lui consecinţele a polimlui ditu Ucraina pi ma multi planuri, di la criza arifugaţloru până la atea alimentară ică energhetică. Klaus Iohannis zbură şi ti evoluţiile regionale şi globale şi u spusi minduita ali României tu ligătură cu catandisea di securitate di la sinurlu ali Românie şi ti polimlu di fuvirseari nkisitu di Rusia.
Klaus Iohannis: “Mesajlu ali Românie, ca stat viţinu şi cu nai ma lungu sinuru anamisa di statele UE şi ale NATO cu Ucraina, easti limbidu, vărtosu şi lipseaşti s’hibă akicăsitu di partenerlli a noştri: cătu va s’va Moscova să-şi justifică acţiunile, Rusia easti un stat agresor cari călcă cu zorea suvearanitatea teritorială ali Ucraina şi vru ta să-lli curmă indepindenţa, di nu u tiñisi niţi Carta ONU. Ucraina easti victima a fuvirsearillei aruse. Tuti efectele negative aliştei agresiuni la nivel global suntu consecinţa directă a acţiunillei ali Rusie, contrară cu ndreptulu internaţional. Comunitatea internaţională ari borgea s’ndrupască Ucraina tra s’nu aproaki agresiunea şi tra s’amintă aestu polimu di elibearare a văsiliillei. România ma largu va u ndrupască Ucraina, a deapoa iţi agiutoru ti securitatea ali Ucraină easti, pănu tu soni, agiutoru ti securitatea ali Românie şi a cetăţenilor a llei.”
Tu arada a lui, prezidentulu Lula da Silva spusi că, pi ningă relaţiile politice şi comerciale pi cari văsilia a lui li ari cu România, suntu importante şi ligăturli umane, di itia că tru Brazilia băneadză cama di 40.000 di cetăţeni di orighine română. Prezidentulu ali Brazilie zbură şi tră polimlu ditu Ucraina:
“Tru kirolu anda guvernul a meu condamnă călcarea a integritatillei teritorială ali Ucraină, himu ti ună cearei politică negociate tră conflict. Zburămu ti cilăstăsearea a noastră tu ligătură cu efectili a polimlui, cari extrapoleadză continentul european. Năpoi aduşu aminti ti cilăstăsearea a mea mutrinda consecinţili globale a conflictului, maxus tru materie di securitate alimentară, economică şi energetică. Lipseaşti s’timilliusimu ntrăoară ună parei di văsilii cari s’şeadă la measă şi cari să zburască cu Rusia tra să s’agiungă la ună cearei di irine.”
Aţelli doi lideri simnară ună declaraţie comună mutrinda dizvoltarea relaţiilor bilatearale tru ma multi domenii. Elli apufusiră turliili di ahănduseari a cooperarillei existentă, ama şi di tindeari tru năi dumenii, catacum cercetarea tru agricultură, digitalizari, alăxeri climatiţi, educaţie şi cultură.
Autoru: Mihai Pelin
Armânipsearia: Taşcu Lala
