Ună nauă criză tru PNL
Libearalii români, năpoi ş-alăxescu, şeflu, după maş giumitati di anu
Ştefan Stoica, 04.04.2022, 12:11
Congresul extraordinar al PNL, la co-guvernari tru România, tră alidzearia-a unui nou prezidentu a formaţiunillei, va va s’ţănă tru 10 apriliu – apufusi, dumănică, Consiliul Naţional al libearalilor. Va s-llia parti 1.300 di delegaţ. Până la congres, PNL va s’hibă condus, interimar, di prezidentul a Consiliului Judeţean Suceava, Gheorghe Flutur.
Sâmbătă, prezidentul a Senatului ali Românie, Florin Cîţu, ș-dimanda demisia di la șefia PNL. Mulţă lideri liberalli, lli-avea căftată, ma ninti ta s’fugă. Elli îlli reproșeadză al Cîțu că aduţi mintireaşi năuntrulu a coaliţiillei guvernamentale, tru relația cu PSD, că nu comunică cu baza partidului şi că ari ună imagine publică slabă, cari zñiipseaşti scorul PNL tru sondajele mutrinda naeţli di vot. Contestatarllii al Cîţu voru ca șefia a partidului s’hibă priloată di premierul Nicolae Ciucă, ti cari media spuni că ari ună imagine multu ma bună tru societate și un dialog coerent cu partenerllii di guvernari. Tiñisitu ca militar di carieră, Ciucă easti, ama, protagonistul a unui cavgă di plagiat, legat di teza a lui di doctorat.
Fostul premier Cîţu fu aleptu aoa şi giumitati di an, la bitisita a meslui yismaciuni 2021. Atumţea, andrupătu di caplu a statului, Klaus Iohannis, el amintă, tu un congres apresu, alidzerli dinintea a altui fost premier, Ludovic Orban, cari conduţea PNL ditu 2017. Orban spusi că la congres s’feaţiră nai ma uruti călcări ale normelor dimocratice cari s’feaţiră vărăoară tru un partid politic, tru aesti 31 di ani”. El dimanda, atumţea, că va lu curma parteneriatului a lui cu Iohannis, a curi lli-eara multu divotat, și, tru andreu, alț dimisionari ditu PNL, thimilliusi un partid nou, cu numa Forța a Dreaptăllei.
Partid istoric, fondat tru 1875, PNL s-prifănsi, totna, că eara la guvernari tru nai ma greali momente ale României: indipedinţa di stat, proclamată tru 1877, când văsilia ascăpa di secole di dominaţie otomană, şi Marea Unire ditu 1918, cându, la bitisita a Primului Polimu Mondial, intra sumu autoritatea Bucureştiului tute provinţiile cu populaţie majoritar românească aflate, până atumţea, sumu stăpuirea a imperiilor ţarist şi austro-ungar.
Scos nafoara a nomlui di dictatura comunistă postbelică, instalată di trupele sovietice di ocupaţie, PNL s’turnă tru arena politică ună ş-ună după Revoluţia ditu 1989. Şi easti pirifanu, că agiumsi disnau la guvernari tru 2007, când România fu aprukeată tru Uniunea Europeană. Di itia a căvgadzloru făr di bitisită tru anlli ditu soni, tricutlu a PNL angreacă multu puţănu tru percepţia publicului di adză. Tru aţelu ditu soni sondaj mutrinda naeţli di vot, libearalii suntu cotaţi cu 16%, cu maş un proţent ma multu andicra di turbulenta opoziţie naţionalistă, AUR, şi cu 20 di proţente ma puţănu andicra di actualii a lor parteneri di guvernari, social-dimocraţllii.
Autor: Stefan Stoica
Armânipsearia: Taşcu Lala
