Transnistria, furñie di găilipseari
România condamnă spunerli psefti aruseşti mutrinda Transnistria secesionistă.
Bogdan Matei, 27.02.2023, 13:21
Diplomaţia română condamnă spunerli psefti, ţi nu au thimelliu, conţănuti tru comunicatul a ministerului rus di Externe mutrinda regiunea secesionistă pro-rusă Transnistria, ditu estul a Ripublicăllii Moldova (ex-sovietică, majoritar românofonă), cum şi retorica fuvirsitoari şi provocatoare ufilisită. Uidisitu cu unu comunicat a Ministerlui di Externe di Bucureşti, propagarea maxutarcu cu hăbări ţi nu suntu simfuni cu averlu di pe teren easti ună abordare di mari piriclliu, tru contextul actual di securitate, tru cari Federaţia Rusă da silă a polimlui di fuvirseari contra ali Ucraină. Easti ti nistrăxeari aestu lucru di creare artificială di tensiuni şi destabilizari — faţi timbihi Bucureştiul, cari faţi cllimari la responsabilitati, la abandonarea retoricăllei fuviroasi şi provocatoari, cum şi la abţănerea di la iţi declaraţii şi acte cari pot s-u zñiipsească stabilitatea a regiunillei şi a Ripublicăllei Moldova.
Tru stil caracteristic, Rusia avea fuvirsită, pritu ministerlu a llei di Externe, că va s’apăndăsească la iţi provocari militară ucraineană tru Transnistria. Şi ministerlu rus ali Apărari apufusi un comunicat tru cari spuni că ari hăbări uidisitu cu cari ucraineañilli ndregu ună provocari tru regiune, la cari va s’llia parti forțili armate a Kievului, inclusiv regimentul naționalist Azov. “Ca furñie ti aputruseari, easti planificată organizarea a unăllei aşi spusă ofensivă a trupelor ruse di pe teritoriul ali Transnistrie. Tra s’facă aestu lucru, ucraineni cari llia parti la acțiune va s’hibă nviscuţ tru uniforma a Forților Armate ale Federație Ruse” – spuni ministerlu di Moscova.
Emu, catandisea ditu zonă easti isihă, fără alăxeri andicra di kirolu di ma ninti – dimăndă delegația a Ripublicăllei Moldova tru Comisia Unificată di Control ditu Transnistria. Și ministerlu ali Apărari di Chișinău cundilleadză că nu ari fuvirseri directi la adresa securitatillei militari a statlui. Aprindu, autoritățli a
Feaţiră cllimari tră isihie și călisiră publiclu s’mutrească izvurili ufiţiali și credibile ali Ripublică Moldova. “Instituțiile a noastri cooperează cu partenerlli xeñi și, tru cazlu a niscăntoru piriclliuri (…), va s’dimăndă fără s’amănă opinia publică” – cundille Guvernul di la Chișinău.
Transnistria ari işită, di facto, di sum controlul autorităţilor centrale după un conflictu armat tu cari muriră suti di oamiñi şi tranşat unăoarăă cu intervenţia askerilor ali Moscovă di partea rebelilor secesionişti, tru 1992, la niţi un an di cându Chișinăulu ş-avea proclamată indipendența. Fostul prezidentu arusescu, Boris Elţinu ş-avea loată borgea tra s’li tragă askerili ditu Transnistria nică di la summitul OSCE di Istanbul, ditu 1999. Aproapea 1.500 di militari şi importante arsenale aruseşti nica suntu aclo. Uidisitu cu analiştillli, secesiunea ali Transnistrie dişcllisi scenariul ti separarea di cama amănatu, tut cu agiutoru arusescu, ali Osetie di Sud şi Abhazie di Georgia şi a Donbaslui di Ucraina.
Autoru: Bogdan Matei
Armânipsearia: Taşcu Lala
