SRI desecretizeadză documenti ali Revoluţie
Tuti documentele cari nica eara ţănuti di Serviciul Român di Informaţii tu ligătură cu revoluţia ditu andreu 1989 fură dati tru şteari tră publicu.
Mihai Pelin, 24.12.2022, 08:43
La 33 di ani di la Revoluţia anticomunistă, Serviciul Român di Informaţii (SRI) dsecretiză tuti documentele ţi li avea tu ligătură cu aesta. Suntu dosarele ti implicarea a cadrilor fostei Securitati tru evenimentele ditu andreu 1989. Easti zborlu ti 13 volume ţi conţănu copii a născăntoru frăndză di arhivă, corespondenţă, situaţii şi note adrati di fosta Securitate. Unu ditu volume ari mesajili şi comunicărli pi cari Securitatea li dimăndă cătă Televiziunea Română, cari fu unu ditu punctele centrali ali revoluţie. Ti exemplu, tru unu ditu mesaje, cadrili a fostăllei Securitati şi spunea, atumţea, andrupămintulu ti surparea a regimlui Ceauşescu. Mesajlu nu agiumsi ama vărnăoară tru public, ama ofiţerllii a fostăllei Securitati spunea că eara hăzări s-yină personal, ma s-eara ananghi, la radio şi televiziune tra s’ndrupască.
Directorlu SRI, Eduard Hellvig, aduţi aminti că, ti amărtie, milioane di români nică aşteaptă averlu ti evenimentele ţi s’feaţiră tru andreu 1989 tra s’ncllidă unăoară ti totna unu ditu capitolili nai ma criminali a comunismului românescu. Şi prezidentulu Klaus Iohannis spusi că niadrareaa-a actului di justiţie tu ligătură cu crimili fapti tru kirolu a Revoluţiillei armâne un punctu nevralgic a societatillei a noastre şi nu faţi că maş s’armănă cu durerea şi nvirinarea. Tru veară, dosarlu ali Revoluţie, tru cari fostul prezidentu Ion Iliescu, fostul viceprim-ministru Gelu Voican Voiculescu şi genearalu (rtr.) Iosif Rus, fost şef ali Aviaţiei Militară suntu stipsiţ că featiră născănti infracţiuni contra a uminitatillei, fu pitricutu diznău la Instanța Supremă. Iniţial, dosarlu eara pitricutu la Instanţa supremă tru 2019, ama giudicătorlli ălu pitricură la Parchetlu Militar ti remedierea ma multi probleme ditu rechizitoriu.
Procurorlli militari spunu că gruparea ţi eara anvărliga di Ion Iliescu, fostu membru a nomenclaturăllei comuniste, acţionă abil şi cu hăiri ti priloareea a putearillei politiţi şi militare tru andreu 1989. El u adusi tru alathusu opinia publică ună turlie constantu, multi ori și sistematic. Uidisitu cu procurorlli, tru tut teritoriulu ali Românie fu declanşată, cu intenţie, ună amplă, sistematică şi complexă acţiune militară di aduţeari tru alathusu, unică tru istoria naţională. Aeast fapte avură ca consecinţe geneararea şi amplificarea a psihoz4llei terorismului, cari dusi la moartea a multor oameni. Tută forţă militară a Românillei eara băgată la dispoziţia Consiliului Frontului Salvării Naţionali (CFSN) – organ provizoriu a putearillei di stat, cari ma amănatu agiundzi s’hibă partid politic – FSN, cumăndusitu di Ion Iliescu. Tru mai 1990 el fu aleptu prezidentu ali Românie. Ma amănatu, avu nica dauă mandate, anamisa di 1992-1996 şi 2000-2004. Cu kirolu, FSN s-alăxi tru PDSR, deapoa tru PSD, aţelu ditu soni hiinda la guvernare, tru aestă oar, tru România.
Autoru: Mihai Pelin
Armânipsearia: Taşcu Lala
