Solidaritate cu Turchia

Ma multi văsilii europene, ntră cari şi România, deadiră agiutoru ali Turchie, după cutreamburlu devastator cari agudi aestă văsilie.

Mihai Pelin, 07.02.2023, 16:25

Parei di căftare şi salvare ditu Statele Unite și Europa fură pitricuti tru Turchia, dupu cutreambruli preşcavi. Seismele devastatoare cari stulţinară, luni, giumitatea sudică a văsiliillei feaţi mări zñii, neise pănă tora muriră cama di trei ñilli di persoane tru aestă văsilie, cum şi multi victime tru Siria viţină. Maş tru Turchia autorităţile misurară aproapea 5.000 di clădiri surpati. Iara scădearea radicală a tempearaturilor aduţi un piriclliu suplimentar di hipotermie tru arada a pliguiţloru, ambudyiusiţ nica sumu surpături.

Ma multi hori membri ali UE apăndăsiră la apelu di asistenţă ali Turchie pritu intermediul a Mecanismului di protecţie ţivilă. Suntu ascumbusiti parei di căftari şi salvare urbană ditu Bulgaria, Croaţia, Cehia, Franţa, Grecia, Olanda, Polonia, iara Ungaria, Italia, Spania, Malta şi Slovacia şi spusiră agiutorlu hăzări. Sistemul di sateliţi Copernicus ali UE fu, tutunăoară, activat tră s’da a autorităţilor locale serviţii di cartografiere di urgenţă. România andrupă statili europene cari agiută tru aestă oară Turchia.

Trei aeronave militari cu 60 salvatori români – parei specializate di căftari-salvare, yeaţră şi asistenţă, parei adrată ditu personal specializat şi parei canină – cu tehni specializată aferentă aterizară tru Adana. Echipa di salvatori români intră tru ligătură cu autorităţli nturţeşti și agiumsiră tru provinţia Hatay. Salvatorlli români ahurhiră s’construiască baza di operaţii, ună ş-ună s’ndreadzi prota parei tra s’ahurhească misiunea di agiutoru. Elli suntu tru niacumtinată ligătură cu autorităţile nturteşti, reprezentanțălli Autoritatillei tră Gestionarea Dezastrelor şi a Situaţiilor di Urgenţă hiinda atelli responsabili tru s’aleagă zona di acţiune şi intervenţie a pareilor viniti s’agiută.

București, Ministerul a Sănătatillei, deadunu cu Universităţile di Medicină şi Farmacie, ascumbusescu profesioniştii ditu domeniu cari voru s’agiută ca voluntari tra s’adară niscănti parei medicale cari s’hibă disponibile tră deplasare tru zonili zñiipsiti ditu Turchia.

Tutunăoară, s’ndreapsi ună campanie di donari săndzu tră victimili cari au ananghi di transfuzii. Suntu ndreapti și yitrii şi materiale sanitare cari pot s’hibă băgati la dispoziţia autorităţilor nturţsţi. Tutunăoară, Ministerul Sănătăţii easti tru ligătură cu ambasada României la Ankara tră eventualili căftări şi tră asigurarea evaluarillei medicale şi a consiliearillei psihologhiţi tră atelli repatriaţ ditu reghiunea afectată.

Turchia easti una ditu aţeali 33 di văsilii cari llia parti la mecanismul di protecţie ţivilă al UE, deadunu cu ateali 27 di văsilii a blocului şi di Norvegia, Islanda, Muntenegru, Macedonia di Nord şi Serbia. Agiutorul UE poati s’hibă căftat, ama di iţi văsilie ditu lumi a curi resurse naţionale di urgenţă suntu stuhinati di un fănico şi au ananghi di asistenţă suplimentară. Cu agiutorlu a programilor a llei di asistenţă umanitară, UE easti, tutunăoară, ndreaptă să-lli agiută pi atelli zñiipsiţ tru Siria.

Autoru: Mihai Pelin

Armânipsearia: Taşcu Lala