Singirlu de autostrăzi s’lărdzeaşti
Nica un tronson di autostradă fu dat tru ufiliseari tru România.
Bogdan Matei, 16.12.2022, 12:39
Di aproapea dauă dekenii, tru cathi campanie electorală, partidele cu ambiţii guvernamentale tăxescu, fără excepţie, că, atumţea cându va ş-bitisească mandatlu, România va s’hibă străbătută di un şingiru di autostrădz ca tru Occident. Iara la bitisita-a mandatlui năpoi facu idyili tăxeri. România, spuni presa, ncllidi nica un an oarfănu tru inaugurări ti infrastructura di transport.
Gioi, tru ţentrul a văsiliillei, fură daţ tră ufiliseari, nu fără niheamă vazi, 13 di kilometri ditu Autostrada A1, parte a Coridorului IV pan-european. Aeşti s’adavgă la aţelli 40 di kilometri a Drumului Expres Craiova-Piteşti, inauguraţ tru veara aluştui an. Suntu tronsoane ditu autostrada di pi Valea Oltului, cotată ca nai ma importantu proiectu de infrastructură rutieră şi, tutunăoară, prota cali di mari viteză cari va s’treacă pisti Carpaţii, di va u legâ Muntenia de Transilvania.
Experţălli spun, ama, că tăş tru 2028 tută autostrada di pi Valea Oltului va s’poată s’hibă dişcllisă. Aesta va s’includă 70 di kilometri tru ună zonă di munte, iara lucrărli va s’ahurhească anlu ţi yini. Cara scenariul optimist va s’hibă tiñisitu, tru şasi ani va s’poată surdituă pi călliuri rapide di Constanţa, nai ma mari căsăbă-portu românesc la Amarea Lae, până la sinurlu cu Ungaria, tru ascăpitată. Nu suntu pi lucru, ama aproapea 150 di kilometri tra s’aibă autostradă completă ditu un capu tru alantu a văsiliillei, dimi trei loturi pi Centura Bucureştiului, patru loturi anamisa di Piteşti şi Sibiu şi nica un lot, ñic, ama cu tuneluri laborioase, anamisa di Lugoj şi Deva.
Decidenţălli ditu ministerlu a Transporturilor spunu că s-feaţi ună jgllioată multu mari şi tră yinmitorlu şingiru cari duţi cătă nord-estul a văsiliillei. Fură simnati contractele de execuţie a secţiunillei Focşani-Bacău, 96 di kilometri pe Autostrada Moldovei, iara constructor easti nai ma vărtosu drumar ditu România, ună firmă tamam ditu judeţul Bacău, tră cari ministrul Sorin Grindeanu nu are că maş zboară di alăvdari.
Tu ţi mutreaşti Autostrada cunuscută cu numa a Unirillei, ţi va s’nkisească ditu ţentrul a văsiliillei, di la Târgu Mureş, până la Iaşi, tru est, şi deapoa la Ungheni, la sinurlu cu Republica Moldova, tut specialiştilli spun că un vade realistu de finalizare easti anlu 2030. Elli cundilleadză că easti zborlu ti aproapea 300 di kilometri, care va s’ţallie munţăllii anamisa di Transilvania şi Moldova. Neise, ună altă ligătură babageană anamisa di provinţiili istoriţi româneşti, apuntea pisti Dunăre di Brăila, amplasată la limita anamisa di Dobrogea, Muntenia şi Moldova, va s’hibă practicabilă tăş di primveara ţi yini.
Ministrul Grindeanu pricănoaşti că lucrărli lipsea s’hibă bitisiti nai ma amănatu pi 20 di andreu, aşi cum ş-avea loată borgea constructorlu italian, maş că călliurli di ligătură suntu hăzări maş pi giumitati, iara apuntea niţi barim nu fu asfaltată.
Autoru: Bogdan Matei
Armânipsearea: Taşcu Lala
