Simona Halep, s’hibă tu bitisită di carieră?
Stsenariulu urghisitu că sagiumsi la naima arăulu lucru işi tu videală: ali agiucătoari română di tenis Simona Halep, di fară armãneascã, ãlli deadiră 4 ani di curmari huzmetea tu agioclu cu ñica topă tu tenisu, tră dopaju.
Ştefan Stoica, 13.09.2023, 23:20
Simona Halep, amintătorea diplo di Grand Şlem, la Roland Garros şi Wimbledon, şi ma ninti numirlu ună mondial, treaţi sticlu di oară cu nai ma marea zori ditu bana sportivă. După un an tru cari nu putu s’llia parti la turnee, românca fu suspendată ti unu kiro di patru añi tră dopaju. Hăbarea vini di la Aghenţia Internaţională tră Integritate tru Tenis. Aesta spusi că unu tribunalu independentu u-ari suspendată Halep tră dauă călcări ahoryea a Programlui Antidoping tru Tenis, ună ligată di aţea că aflară ună substanţă ţi nu ari izini/ tsi easti interdzăsă, neise roxadustatu la US Open tru 2022, dupu unu testu antidoping tru kirolu ali competiţie iara a daua ti neregulile tru paşaporta-a llei biologhică. Paşaporta biologhică easti unu trastu electronicu a valorloru ti niscănti dati biologhiţi, adunati pi hiotea-a kirolui di la aistă sportivă, ditu cari potu s’hibă scoasi tu videală niscănti valori di thimelliu şi ari căbilea si s’veadă niscănti niputeri/ anomalii. Tribunalu apufusi că agiucătoarea feaţi călcări di nomu cu a llei naeti tu Regulamentulu Antidoping.
Instanţa apruke giueapea/ argumentul ali Simonă că lo suplimenti alimentari contaminate, ama apufusi că volumlu nglliţătu di agiucătoari nu putea s’da ca rezultat concentraţia di roxadustat ţi eara aflată tru mostra pozitivă.
Simona Halep să spusi ciudusită si anvirinată di aestă apofasi şi dimăndă că va u contestă tru Tribunalu di Arbitraju Sportiv di Lausanne, tru Elveţia. Tutunăoaă, dimăndă că va s’da tu giudicu compania cari ălli deadi suplimentili alimentari contaminati. “Aţelu ditu soni anu fu nai ma greulu meci ditu bana-a mea şi, ti amărtie, alumta va u ducu ninti. Bana tută u ahărdziiu ti muşeatlu agiocu di tenis. Tiñisescu pănu di mardzina regulili cari kivernisescu/ guverneadză sportul a nostru şi escu pirifană că vărnăoară nu amu loată, cu a mea şteari ică nu, ună substanţă ti cari nu s’didea izini. Nu aproakiu apofasea-a lor pritu cari mi curmară ditu antriţeri ti un kiro di patru ani”, spusi românca tru un comunicatu. Ea spuni că părăstisi a tribunalului spuneri/ dovedz căndisitoari tru apărarea-a llei, nica şi multi ntribări leghitimi mutrindalui concluziili ligatu di testile tru paşaporta biologică.
Simona easti haristusită ti andruparea ţi u avu di partea părinţăloru, a fratilui, di la soia tută, di la soţllli şi a aţiloru miraclleadz ti agioclu di tenisu di lumea tută. Presa tru România zori u cioamină hăbarea ca ti ciudie a pideapsăllei, ună cari, confirmată di cătă la TAS, easti cu căbili ti s’agiungă tu btisită di carieră aestă mari steauă a tenislui şi a sportului românescu.
Comentatorllii probi dizavueadză, di altă parti, teoria ali conspiraţie cari ahurheaşti s’hibă ţăsută şi la cari nu pţăñi suntu aţelli ţi ioparda suntu hăzări să-u-mbărţiteadză cu a loaru minti. Hăbarea ti suspendari vini tamamu tu stămăna tu cari Simona avea işită ufiţialu ditu clasamentul WTA, ti xikea di puncti. Ună căbili ti turnarea-a llei, tru SUMEDRU 2026, ică ma ayoñea cara instanţa ditu Elveţia va-lli ñicureadză pideapsa, nsimneadză, cumu ţi s’hibă, s’facă ună gaereti babageană, neise nu ari preaclle, ti cari specialiştilli nu vedu di căuli s’hibă la ună sportivă cari va s’umplă anlu di amntari, tu bitisita di mesu Yismăciuni, neise 32 di añi.
Autoru: Stefan Stoica
Armănipsearea: Taşcu Lala
