Secretarlu general NATO la București
București sdizvărteaşti, kiro di dauă dzăli, Ministeriala NATO
Leyla Cheamil, 30.11.2022, 07:53
Capitala ali Românie easti nicukira, tu dzălili di marță ş-ñiercuri, ali reuniune majoră tru actualu contextu di securitate genearat di polimlu ruso-ucrainean. Şefllii a diplomaţiilor ditu statili a Alianţăllei Nord-Atlantice , ditu statele partenere si ditu aţeali dauă stati candidate la aderare suntu Bucureşti tră dauă dzăli di discuţii concentrate ti agresiunea ali Rusiei tru Ucraina viţină. Aflat, di luni, tru România, secretarlu general al NATO, Jens Stoltenberg, avu muabeti cu liderul di la București, Klaus Iohannis, ti situaţia di securitate pi flancul estic ali Alianţă. “Va s’adrămu tut ţi easti ananghi tra s’protejemu şi s’apărămu tuţ aliaţlli. Aoa, Bucureşti, miniştrilli di Externe ali NATO va s’caftă modalităţ tra s’ndrupască, ma larg, Ucraina şi tra s’ţănă keptu la presia ali Rusie tru Bosnia-Herţegovina, Moldova şi Georgiaˮ, spusi Jens Stoltenberg. Aestu cundille că România să spusi ca un nicukiru filotimu tră un numir babageanu di arifugaţ și licşură exportul ti milioani di tonuri di yipturi ditu Ucraina, tra s’licşureadză criza alimentară mondială, asigurânda, tru idyiulu kiro, agiutoru militar semnificativ ti Ucraina. Prezidentulu rus, Vladimir Putin, mindueaşti s’ufilisească iarna ca pi ună armată tru polimlu contra ali Ucraină, spusi secretarlu general al NATO, Jens Stoltenberg, cari cundille că aestu nu poate s’hibă alăsatu s’amintă polimlu, di itia că, aestă turlie, şi alţă lideri va s’veadă că pot ta ş-bagă tru scupo anăkiseri pritu furteată.
Tu arada a lui, prezidentulu Klaus Iohannis spusi că, tru contextul alustui polimu, easti ananghi, ma multu ca vărnăoară, ca Alianţa Nord-Atlantică s’hibă vărtoasă şi solidară şi s’aşteaptă ca reuniunea di la Bucureşti s’confirmă aestu obiectiv. Tut luni, ninti tra s’ahurhească ministeriala NATO, Jens Stoltenberg s-adună și cu premierlu Nicolae Ciucă. El haristusi ali Românie tră contribuţia la politiţli şi misiunile Alianţăllei, ama şi tră criştearea a bugetlui Apărarillei, ahurhinda ditu 2023, la 2,5% ditu PIB. Cundille, tutunăoară că NATO agiumsi la 300.000 oamiñi forţă di reacţie cu grad tanaltu di pregătire ţi potu s’hibă dizvărtiţ la diferite momente, dublarea a numirlui di Grupuri di Luptă la nivel di batalion, cu căbilea ti creastire la catandisea di brigadă, şi dublarea a numirlui di echipamente prepoziţionate tru regiune. Şi ministrul român di Externe, Bogdan Aurescu, avu ună andamasi cu Jens Stoltenberg. Secretarlu General NATO haristusi a oficialui român tră pregătirli tru noima di nicukirată a Bucureştiului, ali reuniuni ministerială di externe a Alianțăllei. Stoltenberg sumlinie importanţa ca NATO şi aliaţllii s’ducă ma largu lucărlu ti dari agiutoru autorităţlor di la Kiev, tră anvărtuşearea a rezilienţăllei dinintea a fuvirserloru fără precedent cu cari s’confruntă. “U criscum prezenţa tru România, tru regiunea ali Amarea Lae, kiro fi mulţă añi, după ţi Rusia arăki paranomu Crimeea, tru 2014. După anăpădearea ali Rusie tru Ucraina, tru meslu şcurtu, adusimu ma multi askeri, u criscum prezenţa aeriană şi navală şi aesta demonstreadză că NATO easti angajată s’apără cathi centimetru ditu teritoriul aliatˮ, spusi analtul oficial ali Alianță Nord-Atlantică.
Autoru: Leyla Cheamil
Armânipsearea: Taşcu Lala
