Schengen – Austria blocheadză România

Dupu votlu singular ali Austrie, românii armasiră, diznău, nafoara-a Spaţiului Schengen.

Warning: Trying to access array offset on null in /home/web/rri.ro/public/wp-content/themes/rri/template-parts/content.php on line 98
Bogdan Matei, 09.12.2022, 15:20

Croația va s’intră tru spațiul Schengen, di liberă urdinari, di la 1 di yinaru 2023 — dimăndă, gioi prezidenţillea cehă a Consiliului Uniunillei Europene. Miniștrii di Interne a statelor membre, andămusiț Bruxelles, tru Consiliul Justiție și Afaceri Interne (JAI), aprobară cooptarea republicăllei ex-iugoslave, intrată tru Uniune tru 2013, și tru aest spațiu, tru cari aproapea 400 di milioane di oameni pot s’urdină eleferu, fără controale la sinurli interne. Alliumtrea, candidaturile ali României și Bulgarie, membre ale Uniunii ditu 2007, nu fură aprukeati. Contra a loru să spusiră Austria, iara Olanda ș’ufilisi ndreptulu di veto maş tră Bulgaria.

“Purtaticlu regretabilu şi nianţimilleatu ali Austrie ditu cadrul ali andadamasi di adză bagă tru piriclliu unitatea şi coeziunea europene, di cari avem ahât multu ananghi, maxus tru actualu contextu geopolitic” – spuni prezidentulu a României, Klaus Iohannis.

Participanut la Consiliu, ministrul di Interne tru guvernul PSD-PNL-UDMR di București, libearalu Lucian Bodi, mindueaşti că “votlu contra aderarillei ali Românie la Schengen easti un vot contra ali UE tru ansamblul a llei”, di cari va s’hărsească arușllii — cu pitriţeari la relaţiile cabaia cordiale ale cancelarului austriac, Karl Nehammer, cu liderlu di Kremlin, Vladimir Putin.

Unitatea şi stabilitatea europeană loară ună goadă sertă ditu partea a unui stat cari aleapsi ca tru kiro multu greu ş-alasă soţlli europeni şi s’agiuytă ti sinferlu ali Rusiei – lugurseaşti şi liderul social-democrat Marcel Ciolacu. El nica mindueaşti că niaprukearea ali României easti şi un eşec a dreaptăllei europene, di itia că formaţiunea conservatoare cari guvernează Viena easti parteneara PNL şi UDMR tru Partidlu Popular European.

Ditu opoziţie, liderul USR, Cătălin Drulă, lugurseaşti că apofasea a Consiliului JAI easti cabaia cu niandriptati, iar ministrul Bodi lipseaşti să-şi da demisia.

Prezidentulu AUR (opoziția naționalistă), George Simion, cafta demisia a cabinetlui Ciucă și lugurseaşti că apofasea di Bruxelles easti un eşec cu vazi tră tută diplomaţia româneascăCiudusearea, amărăciunea şi frustrarea nu suntu exclusiv româneşti.

Exercitându-şi, solitară, ndreptul di veto, Austria ş’ofensă, pănu tru soni si alanţă parteneri comunitari. Tuti alanti state membre ale Uniunii Europene andrupără, la unison, candidatura a românilor. Tru favoarea aliştei votară, cu ună majoritate netă, şi eurodeputaţllii ditu tuti fumellili ideologhiţi. Comisia Europeană nu dănăsi să spună nica na oară că România titñiseaşti tuti criteriile tehnice. Ma multu di tuti aesti argumente raţionale, spunu comentatorii, tru Austria angrică isăchi psefti electorale, nintea a unui scrutin regional parţial, programat tru yinaru. Una ditu temele di campanie al Nehammer, a curi partid seadi slabu tru sondaje, fu dănăsearea a dalgăllei ti aşi dzăslu flux di migranţi paranomu, cari poati s’treacă pritu România şi Bulgaria, lucru orlea zorlea infirmat di isăkili comunitare.

Autoru: Bogdan Matei

Armânipsearea: Taşcu Lala