România, prezenţă la kipită tră funearaliile a Vsiloañillei Elisabeta a II-a
Prezidentulu Klaus Iohannis, custodili a Cărunăllei ali Românie, Margareta, şi prinţipele consortu Radu va sllia parti la Funearaliile di Stat a Văsiloañillei Elisabeta a II-a.
Roxana Vasile, 14.09.2022, 12:15
Lidiri politiţ importanţ şi reprezentanţă a casilor văsilikeşţi ditu lumea tută suntu aştiptaţ s’llia parti la Funearaliile di Stat a Văsiloanillei Elisabeta a II-a, cari dusi la Aţelu di Analtu tru 8 di yismăciuni la Castelu Balmoral ditu Scoţia, la ilikia di 96 di ani. Uidisitu cu Pălatea Buckingham, Funearaliile va s’ţănă luni, pi 19 yismăciuni, la oara locală 11:00, la catedrala Westminster Abbey ditu Londra.
România va s’hibă reprezentată di prezidentulu Klaus Iohannis. El ari simnată, ma ninti, tru cartea di puryurii dişcllisă tru memoria a Văsiloanillei la reşedinţa di București a ambasadorlui Regatlui Unit ali Mari Britanii şi Irlandăllei di Nord.
ʺTru aesti momente di mari anvirinari, România easti deadunu cu populu britanic şi cu Familia Regală, ambărţitănda durearea a dumnilliloru a voastri şi aducânda ună tiñie ti memoria a Majestatillei a Llei. Hiinda ti un kiro di şapte dikenii, la dumnille, Majestatea a Llei u modelă istoria modernă şi va s’hibă adusă aminti ca un simbol excepţional di loialitate şi angajamentu andicra di serviciul public. Clirunumia a Majestatillei a Llei va s’armână tru inimile şi minţăli a noastriʺ – angrăpsi prezidentulu Iohannis tru cartea di puryurii.
A deapoa Familia Regală românească, anviţă cu ʺmari dureariʺ ti hăbarea că dusi la Aţelu di Analtu Văsiloañea Elisabeta a II-a. Dolli descendenţă a Văsiloanillei Victoria, Elisabeta a II-a și fostul Văsille Mihai I ali Românie, ţi muri tru 2017, eara cusuriñi di gradlu al III-lea. Istoria cundilleadză că Mihai ș-cunuscu nicukira, neise Prințesa Ana, tru 1947, la numta a Elisabetăllei cu Prințul Phillip. Iara tru 2012, suvearanlu român eara nandreapta a Văsiloanillei tu kirolu a evenimentelor organizate cu itia a Jubileului di Diamantu, hiinda ligaţ bana tută pritu vreari, tiñnie şi suţălle.
Tora, anda fudzi ditu aestă lumi Văsiloañea Elisabeta a II-a, custodile a Coroanăllei ali Românie, Margareta, şi prinţipile consort Radu va s’llia parti la Funearaliile aliştei di Londra.
ʺMajestatea a Llei Margareta avu tru Văsiloanea Elisabeta a II-a, bana tută, un inegalabil agiutoru, urneki di cumăndusari văsilikească şi curaj, un faru luñinos. Văsiloanea Elisabeta daia fu prezentă tru bana a Familliei Regale române şi avu ună niacumtinată ligătură di familie. După ţi kiru Văsillelu Mihai şi Duceli di Edituburgh, tră Majestatea a Llei Margareta, Văsiloanea Elisabeta a II-a fu un punct di referinţă di mari simasie, un andrupămintu moral, intelectual, afectiv şi instituţionalʺ – sumliniadză Casa Regală ali Românie.
Ari multă dureari, dzăli aestea, tru Regatlu Unit, tră aproapea tuţ britaniţlli Văsiloanea Elisabeta hiinda monarhulu golu pi cari ălu cunuscură. Ari, ama, și multă nădie şi entuziasm tră năulu Văsille, Charles al III-lea, tru cari România ari un soţu multu aprukeatu.
Autoru: Roxana Vasile
Armânipsearea: Taşcu Lala
