România nu va s’aibă problemi cu gazili naturale
Bucureștiul salută, tru cadrul a unăllei ţeremonie, ahurhearea lucărlui ti exploatarea a gazilor ditu perimetrulu românescu Midia, ditu Amarea Lae.
Leyla Cheamil, 29.06.2022, 17:42
România easti, tru aestu, kiro văsilia ditu Uniunea Europeană nai ma puțănu dependentă di gazlu arusesc, easti doilu mari producător di petrol și gaze ditu spațiul comunitar și ari cantităț mări di gaze naturale niexploatate tru Amarea Lae. Volumlu estimat a dzăcămintilor maritime easti di 200 di miliardi di metri cubi. Nai ma marea cantitati easti tru perimetrul Neptun Deep, exploatat di compania românească di stat Romgaz şi OMV Petrom. Di aclo, protili gaze potu s’hibă loati tru bitisita a anlui 2026 ică tru ahurhita anlui 2027.
Tru aestu kiro, tru perimetrul Midia, la aproapea 120 di kilometri di ţărmul a Româniillei, cari ancurpilleadză dzăcămintele ʺAnaʺ şi ʺDoinaʺ, lucrărli di exploatari suntu ahurhiti, aţeali ţinţi sondi a companiillei Black Sea Oil&Gas va s’asiguripsească 10% ditu consumlu a văsiliillei. Ună sondă submarină la dzăcământul ʺDoinaʺ și patru sondi la dzăcământul ʺAnaʺ au tru plan s’extragă giumitate di miliard di metri cubi di gaze până la bitisita a anlui. Tut cu tut, pritu aestă investiţie, ari căbili tra s’hibă scoasi 1 miliardu di metri cubi di gaze anual. Di altă parti, protili cantităţ di gaze fură livrate tru sistemlu naţional.
Ditu 15 di cirişaru, di cându ahuhri extracţia ditu dzăcământul “Ana”, 3 milioane di metri cubi di gaze intră cafi dzuuă tru sistemul naţional di transport. Neise, aestea suntu adusi ditu Amarea Lae, pi litoral, până tru staţia di tratari di la Vadu, iu trec pritu un proţes di separari a fazăllei lichidă di aţea gazoasă şi pritu unu di uscari. Tru aestu kiro, România easti la 41% ditu capacitatea totală di stocari a gazilor naturale, iara până la 1 di brumarue Bucureștiul ş-lo borgea andicra di Uniunea Europeană s’agiungă la 80% – ananghea minim tră iarnă.
Directorul gheneral Transgaz, Ion Sterian, cundille: ʺNoi nu himu tru situaţia alăntor văsilii la iarnă, di itia că avem producţia internă şi nu avemu ti ţi s’aduţemu asparizmă. S’adună tu măgăzii 10-12 milioane di metri cubi di gaze ndzuuă. Adz4 avemu nmagazinată 1 miliardu 270 di milioane di metri cubi di gaz.ʺ
Cu arastea a unei ţeremonii organizată, marță, la Vadu, cu ucazea că ahurhi exploatarea a gazilor naturale ditu perimetrul Midia, primlu ministru Nicolae Ciucă pitricu un mesaj pritu cari da curayiu a tutăloru companiilor xeani şi româneşti cari vor s’inveastească tru România: ʺFaptul că aest proiect va s’aducă 1 miliard di metri cubi di gaze naturale tru an nsimneadză că va s’agiundzemu s-asiguripsimu 90% ditu ananghea di consum ali Românie. Easti un salt remarcabil şi yilipseaşti axia a Româniilei tra s’află năi resurse şi cearei tru un kiro tru cari furnizarea di gaze naturale la nivel mondial easti fuvirită di polimlu ditu Ucraina.ʺ
România ș-pripune s’agiungă indipendintă energetic, un furnizor di securitate energetică tru reghiune, ama şi ună cali di purtari tră gazili şi energia veardi ditu Amarea Caspică.
Autoru: Leyla Cheamil
Armânipsearia: Taşcu Lala
