România, independentă di nafta arusească
România easti independentă di nafta arusească - da asiguripseri autoritățli di București.
Daniela Budu, 06.12.2022, 14:50
România agiumsi independentă di nafta ditu Rusia, iara embargoul tră importurli ditu aestă văsilie, intrat di luni tru practico, nu va lli aducă zñie, tru condiţiile tru cari companiile petroliere aflară resurse alternative şi numata aduc nafta di aclo. Hăbarea fu faptă di ministrul ali Energie, Virgil Popescu, la ună conferinţă di presă tru cari năpoi spusi că Bucureștiul ari duri stocuri di petrol şi gaze tra s’treacă ghini tru aestă iarnă. Ma multu, spuni ministrul, nica di stămâna tricută, companiile petroliere şi rafinăriile ditu România proceseadză maş naftă non-arusească.
Virgil Popescu: “Nu avem probleme cu aprovizionarea cu gaze naturale ali Românie şi dukitu că România agiundzi s’hibă, preayalea-ayalea, un hub di gaze regional. Pritu România s-duc gaze şi tru Moldova, şi tru Ucraina, şi tru Ungaria. Dimi, România ş-ari imnaticlu a llei, ş-ari imnaticlu european, ş-ari imnaticlu di producător di gaze, di yinitor exportatoru di gaze, va s’asiguripsească securitatea energetică ahătu ali Românie, cât şi a regiunillei. Nu avem probleme niţi tru aestă iarnă cu aprovizionarea cu gaze naturale. Româñilli lipseaşti să ştibă că nu avem probleme niţi cu nafta, niţi cu carburanţălli, niţi cu gaze naturale, niţi cu energia electrică.”
Şi directorlu general ali Societati Națională di Transportu Gaze Naturale “Transgaz”, Ioan Sterian, deadi asiguripseri că ari ună producţie internă semnificativă di gaze și că nu suntu itii ca româñilli să s’aspară că tru aestă iarnă va s’armână fără resursi.
Alliumtrea, criza a lemnilor di foc ti populație fu, luni, tru menga a Camerăllei a Deputațlor di București. Ministrul a Fisillei, Tánczos Barna, fu căslisitu la Oara a Guvernului di cătră AUR, tru opoziţie, tra să zburască ti problemili cauzate di plafonarea a păhadzloru la leamnili di foc, tru contextul tru cari cadrul legal armasi nialăxitu, acă coaliţia la puteari taxi că va s’alăxească ordonanţa pi cari u deadi ma ninti. Ministrul cundille că prioritatea-a Executivlui fu vigllearea a bănătorloru, ama apruke că efectele a ordonanţăllei di urgenţă nu fură ateali aştiptate.
Tánczos Barna declară că Regia Națională a Pădurlor – Romsilva şi nicukirlli privaţ, respectiv unităţile administrativ-teritoriale, băgară estanu pi păzari ună cantitati di lemnu di foc cu pisti ună miliuni di metri cubi ma mari andicra di 2021. Uidisitu cu năsu, păhălu a lemnului di foc s’alăxeaşti di la ună regiune la alanta, furñie tră cari s’feaţi plafonarea la 400 di lei (80 di euro) pi metru cub, iara tru paralel, Romsilva lo apofasi tra s’asiguripsească lemnulu di foc şi tră anlu ţi yini.
Tánczos Barna: “Adrămu un plan di investiţii pritu cari va s’thimilliusimu 178 di năi depozite di lemnu di foc, va s’modernizămu ateali 240 di ţentre ţi suntu pi lucru la Romsilva. Tru yinitorlli doi-trei añi va s’avemu un buget di pisti 60 di milioane di euro, buget di investiţii.”
Liderlu AUR, George Simion, spusi că ministrul nu apăndăsi la căftărli di alăxeari a ordonanţăllei di urgenţă, aţea turlie că tuţ cetăţeañilli s’aibă hăiri isa-isa di lemnu di foc, indiferentu di zonă. Iara USR, tut tru opoziţie, lu stipsi ministurlu ti ixiki di curayiu tru ţi mutreaşti loarea meatri corecte ti populaţie, tru condiţiile tru cari ari specialişti şi tuti resursele anănghisiti.
Autoru: Daniela Budu
Armânipsearea: Taşcu Lala
