România, di aproapea două dekenii tru NATO
România yiurtusi 19 di ani di la aderarea la Alianța Nord-Atlantică
Leyla Cheamil, 03.04.2023, 18:48
S-umplură 19 ani di căndu România agiumsi membră a Alianței Nord-Atlantice, intrânda, ase, sum protecția organizației și hărsinda-si di nai ma vărtoasă garanție di securitate. Pi 29 di marţu 2004, statul român aderă la NATO, pritu dipunerea instrumentelor di ratificare la Departamentul di Stat ali SUA, stat depozitaru a Tratatului Alianței Nord-Atlantice. Tru idyiulu an, pi 2 apriliu, la sediul NATO, s’ţănu teremonia ti alinarea fiiţială a hlamburăllei. Aestă dată agiumsi dzuua NATO tru România, tru kirolu anda, pi 4 apriliu, s’yiurtusescu 74 di ani di la thimilliusearea ali organizație. Tru aestu context, șeflu a statului român, Klaus Iohannis, spusi că Bucureștiul va u promoveadză anvărtuşeamea a ligăturăllei transatlantiti şi a parteneriatlui strategic ditu Alianța Nord-Atlantică şi Uniunea Europiană.
“Va s’himu mintiţ tru misiunile şi angajamentele aliate, a deapoa, anvărtusearea a axiillei di apărare naţională ma largu va s’hibă ună prioritate a României, inclusiv pritu alocarea, ahurhinda cu aestu anu, a 2,5% ditu PIB tră Apărareˮ, spusi Klaus Iohannis. El adăvgă că va s’hibă promovate, tru idyiulu kiro, anvărtuşearea a ligăturăllei transatlantiţi şi a parteneriatlui strategic ditu NATO şi bloclu comunitar, catacum şi agiutorlu ti creastirea rezilienţei partenerilor ditu regiune, maxus Ripublica Moldova, Ucraina, Georgia şi Bosnia şi Herţegovina. “Adză, căndu continentul european s’ampuliseasti cu nai ma greaua criză di securitate ditu dekeniili ditu soni, di itia a polimlui ilegal şi nejustificat nkisitu di Rusia contra ali Ucraina, rolu fundamental al NATO tru asiguripsearea a irinillei şi apărarea libirtatillei, a valorlor democratiţi comune, a securitatillei şi a prucukiillei tră membrii a llei easti ma important ca vărnăoarăˮ, cundille liderlu di București. Prezidentulu Iohannis spusi că Alianţa lu spuni nica nă oară, caracterul indispinsabil şi relevanţa absolută tru planlu a securitatillei, hiinda unu ditu sturlli di yhimelliu pi cari s’fundamenteadză apărarea a tutulor membrilor a llei, inclusiv a Româniillei, deadunu cu efortul național.
Tu arada a lui, premierlu Nicolae Ciucă adusi un omagiu a aţiloru cari s’feaţiră curbani ti “ună lume ma sigura, sum protecţia NATO, nai ma vărtoasă alianţă politico-militară ditu istorieˮ. Nicolae Ciucă spusi că România, pritu volea pănu di mardzină a bănătorloru a llei şi limbidzamea a cumăndarloru a llei, aleapsi calea democraţiillei, a libirtatillei şi a vocaţiillei europeane şi occidentale. Pi di altă parte, ministrul Apărarillei Naționale, Angel Tîlvăr, spusi că, nică di la accedirea cu tuti ndrepturli tru Alianţă, România cilăstăsi ti băgarea tu practico a apofasiloru aliate pritu ună participare consistentă cu askeri şi hălăţ la misiunile NATO ditu Orientul di Mesi şi Balcanii di Vest, catacum şi tru cadrul a exerciţiilor şi aplicaţiilor disvărtiti tru statili aliate şi partenere.
Autoru: Leyla Cheamil
Armânipsearea: Taşcu Lala
