România ari, diznău, ună canoe di malămă
Malămă tră România la Campionatele Mondiale di kaiac-canoe di la Halifax, Canada!
Florin Orban, 08.08.2022, 18:00
Sporturli nautiţi ditu România suntu tru mplină riyineri pe sţenele marillei performanțe internaționale. Anlu 2021 fu aţelu a canotajului, avănda tu kipită malăma olimpică adusă di Ancuța Bodnar și Simona Radiș di la dublu vâsle. Anlu 2022 pare s’hibă aţelu a canoiștilor și caiaciștilor, ma s’acăţămu tu isapi ateali dauă medalii amintati la Mondialele ditu Canada, di la Halifax — ună malămă și ună asimi, amintati di Cătălin Chirilă. Medalia di malămă fu amintată dumănică, la canoe simplu, pe distanța di 1000 di meatri, prima victorie românească la aestă probă, la Mondiale, după 36 di añi.
Aţelu ditu soni român campion mondial pe 1000 di metri fu Aurel Macarencu, tru 1986. Nintea a lui avea fută legendarul Ivan Patzaichin, di dauă ori, tru 1973 și 1977, după ună cali dişcllisă di Simion Ismailciuc, cu titlul mondial amintatu tru 1963. Tora, la Halifax, Chirilă bitisi cursa cu cama di ună secundă și giumitate ma ayoñea andicra di brazilianlu Isaquias Queiroz dos Santos, campionul olimpic ali probă.
Feaţi ună cursă ghini ndreaptă tactic, hiinda paturlu la 250 di metri, idyea și la 500, diapoa, tru partea a doua a cursăllei, diadi silă, fu protlu la 750 di meatri și lli-alăsă năpoi concurenţălli cătă tru bitisită. Românlu ș-lo aestă turlie, revanșa după azvindzearea di sâmbătă, di la 500 di metri, cându dos Santos amintă malăma, iara el alină pi da daua scară a podiumului.
Tru perspectiva a Jocurilor Olimpice cari s’aproaki, Cătălin easti, vără turlie tru aantaj, avânda tru vidială că, tru 2024, Paris, la simplu va s’antreacă maş pi 1000 di meatri, distanță pe cari el easti, di dumănică, nai ma bunu ditu lume.
Lipseaşti s’adăvgăm că România numata avea amintată un titlu mondial la ună probă olimpică di kaiac ică canoe di mulță añi. Ma multu, aoa şi doi añi, la Mondialele di Copenhaga, niţi unu sportiv ică echipaj român nu acăţă vără finală. Niţi tru 2019, la Szeged, tru Ungaria, România nu amintă vără medalie, nai ma bună clasare hiinda aprăftăsită di Victor Mihalachi şi Cătălin Chirilă, loclu 5 tru finala a probăllei di canoe dublu la 1.000 di metri, cari lă adusi și calificarea la Jocurile Olimpice di la Tokyo. Atea ditu soni medalie românească la Mondiale eara ditu 2017, cându, la Račice, tru Cehia, Victor Mihalachi şi Leonid Carp amintară asimea la canoe dublu tru proba di 500 di meatri.
Ti Cătălin Chirilă nica lipseaşti să spunemu că easti legitimat la Clubul Sportiv al Armată Steaua București. S-amintă la 11 mai 1998, Tulcea. Amintă prota a lui mare performanţă ditu cariera di senior la Jocurile Europene di la Minsk, ditu 2019, iu, pe distanţa di 1000 di metri, amintă malăma la canoe dublu diadunu cu Victor Mihalachi. Tru idyea formulă, anlu tricut, echipajlu român di canoe dublu amintă medaliile di bronz la Campionatele Europene di la Poznan. Chirilă s-concentră cama diapoa pi probili di canoe simplu, iara rezultatili nu amănară.
Autoru: Mihai Pelin
Armânipsearia: Taşcu Lala
