Atenţia lumillei democratiţi ari tu amprotusa, ma largu tru minti Ucraina şi consecinţili a agresiunillei la cari Rusia u stuhineadză di aproapea un an. Secretarul di stat al SUA, Antony Blinken, şi ministrul di Externe ali Japonie, Hayashi Yoshimasa, co-prezidară, marţă, ună reuniune tru format G7+ la nivel di miniştri a afacerlor externe, disvărtită tru sistem videoconferinţă.
Fu a daua reuniune tru aestu format, prima hiinda organizată tru România la bitisita-a anlui ţi tricu, tru marja a reuniunillei miniştrilor di externe ditu statele membre NATO. La ea nica loară parti miniştrilli di externe ică analţă reprezentanţă ditu statele G7 (pe ningă SUA şi Japonia, Canada, Franţa, Germania, Italia, Regatul Unit), cum şi ditu Republica Cehă, Estonia, Letonia, Lituania, Polonia, Slovacia, Bulgaria, deadunu cu reprezentanţi ali Uniunii Europene, Comunitatillei Energhetiţi Europene, BERD, Programlu a Naţiunilor Unite tră Dizvoltare (PNUD) şi Băncăllei Mondiale.
Participanţălli feaţiră isapi, ti catandisea a infrastructurăllei energhetice critică ali Ucraina, cari trapsi cabaia cu atacuri vărtoasi şi repetate di partea ali Rusie, iara mubeţli mutriră agiutorlu dat ali Ucraină di comunitatea internaţională tră s’kivernisească consecinţili aluştoru atacuri şi tra s’crească rezilienţa aliştei. Şeflu ali diplomaţiei di la Bucureşti, Bogdan Aurescu, cundille ti creastirea asistenţei acordate ali Ucraina şi spusi că România va s’agiută ma largu aestă văsilie, tru coopearare cu tuţ partenerii cari ambărţiteadză idyili viziuni şi obiective. Aurescu cundille că atacurli repetate, la scară largă, ti infrastructura ţivile ditu Ucraina easti ună călcari flagrantă a ndreptului internaţional umanitar, avânda obiectivul tra s’azvingă rezistenţa societatillei ucrainene, iar comunitatea internaţională democratică nu poate s’hibă simfună cu aestu lucru.
Tru aţea ţi mutreaşti asistenţa oferită di România tră anvărtuşearea a securitatillei energhetiţ ali Ucraina, Bogdan Aurescu cundille că hub-ul umanitar di la Suceava licşură, ntră altili, purtarea a aţiloru 40 di generatoare achiziţionate di România cu fonduri europene, a dzăţ di alte genearatoare oferite di guvern şi autorităţ locale române, respectiv a aţiloru cama di 160 di genearatoare oferite di Franţa. Ministrul Aurescu adusi tu videală şi planificarea a unei nauă andamasi a Trilatearalăllei miniştrilor di Externe ali Românie, Ucraina şi Republica Moldova, tru şcurtu, după aţea di Odesa, ditu yismăciuni anlu ţricutu, tru cadrul a curi eara convenite linii comune di acţiune tră dizvoltarea interconectivitatillei şi anvărtuşearea a securitatillei energhetiţi ali Ucraină şi Ripublica Moldova, pi kiro di mesi şi lungu kiro.
Bogdan Aurescu scoasi tu videală, di altă parte, situaţia speţială ali Republicii Moldova, confruntată cu ună ahăndoasă criză energetică, generată di limitări tru atea ţi mutreaşti disponibilitatea şi acceslu la resursi. România, adusi aminti năsu, asigură 80% ditu ananghea totală di consum di energhie electrică ali Ripublicii Moldova, cum şi tranzitlu di gaze cătră aestu stat pritu gazoductul Iaşi-Ungheni-Chişinău.
Autoru: Stefan Stoica
Armânipsearea: Taşcu Lala